Има надеж
Полицајката од Аргентина Селест Жакелин Ајала минатата недела стана хит во целиот свет откако го надои гладното дете кое беше одвоено од своите родители по доаѓањето во детската болница во Буенос Аирес. Таа веднаш беше унапредена во поручник, а целиот настан се случи откако Селест, која е мајка на две деца од кое едното е шестмесечно бебе, препозна дека бебето е гладно и почна да го дои. Нејзиниот колега Маркос Ередија беше изненаден од нејзиниот гест и фотографијата ја објави на Фејсбук, па за кратко време почнаа да пристигаат огромен број лајкови и позитивни коментари, а приказната заврши во медиумите ширум светот. „Не се двоумев ни секунда, веднаш му дадев да цица и се смири“, изјави таа за странските медиуми.
Инаку, Селест работи како полицаја три години, а неретко работи и прекувремено за да заработи доволно за живот. Нејзиното унапредување во поручник сигурно ќе и значи многу, а и ние сме пресреќни кога ќе видиме дека некаде во светот добрите луѓе се наградуваат.
