Внесете свежина и позитивна енергија во вашиот дом така што ќе го декорирате во духот на велигденските празници. Додека сме дома имаме повеќе време да се посветиме на креативните декорации и да направиме нашиот дом да блесне во едно оригинално издание.
Направете сами оригинални, практични, ефикасни и евтини венчиња кои ќе можете да ги користите и неколку години по ред. На пример, маслинови гранчиња или било кои други кои лесно се виткаат без да се скршат, употребете ги за кружниот дел на кој ќе прицврстите декорација по желба. Не мора тоа да бидат јајца или зајачиња, туку можете и цвеќе или машнички, но и се’ она во што уживате.
Конец, чипка и стара ткаенина секогаш се добар сојузник во декорациите. Со текстил, волна и конец, лесно ќе го обложите венецот кој ќе биде цврст и естетски привлечен, а при декорациите можете да користите и жица за прицврстување или течен лепак.
Венецот не мора секогаш да биде висечки. Баш како и за Божиќ, можете да го ставите на маса и со него да ја декорирате вашата велигденска трпеза.
Исто така одлична идеја е да го ставите венецот во некоја стара рамка. Веруваме дека во вашиот дом имате стари слики кои повеќе не висат на ѕидот и чекаат некоја следна употреба… Во рамката поставете ја декорацијата која од едната страна ќе биде поврзана со жица.
