Научно е докажано – ако НЕ се омажите до 22 години, вашиот живот нема никаква смисла
Претставниците на здружението „Факти што не се битни и ладење на мади*а“ ги објавија во Сараево резултатите од нивното истражување „Положбата на жените во босанското општество и зошто треба да се биде хоризонтален“ на прес-конференција во Стариот Град.
„На овој начин само сакавме да им укажеме на нашите драги дами, ма колку феминизмот и да е во залет и колку да се трудите вие да бидете напредни и самостојни, сепак, главна и основна цел во вашиот живот треба да биде да се омажите, да родите и да создадете потомство.“
„Западот сака да го уништи сето она што жената ја прави жена и ваквото наше мислење навистина го потврдивме со опсежно истражување кое што го спроведовме на десетина мажени и немажени жени. Истражувањето ни потврди дека овие немажените се нервозни, плачливи, нерасположени и дека потполно имаат тажен живот. Овие мажените не се многу расположени, но барем имаат сопруг на кој можат да му се извикаат, а тоа ќе признаете, е голем плус, предност и благослов“, изјави за порталот Сатро.инфо претседателот на ова здружение, Хариз Захриага.
Инаку, жените не учествуваа на прес-конференцијата бидејќи претставниците на ова здружение сметаат дека жена што седи на маса е знак на лоша среќа.
„Ние сакаме нашите драги девојки да сфатат дека филмовите, сертификатите и работата се трендови на кои ќе им помине времето, а децата, мажите и миењето чорапи се вечни приоритети. Така било отсекогаш и така ќе биде секогаш. А вие драги дами ако сакате да ве гледаат попреку на семејните ручоци останете самостојни“, додаде Захриага за крај.
Текстот е од сатиричен карактер чија цел е да ве развесели и насмее во овие тмурни, луди времиња. Целосно е преземен од порталот satro.info, а бидејќи сметаме дека е потполно соодветен и за нашите околности, решивме да го пренесеме. Доколку не ви изгледа смешно, ви се извинуваме што не сме во состојба да ви помогнеме…