Штипка продолжува со серијалот совети за совршен изглед на празничните прослави.
Ги прашавме македонските дизајнери што би ви препорачале за да изгледате оригинално и впечатливо на новогодишната ноќ и тие несебично ги споделија нивните совети. По Бобан Илиевски, денес совети ви дели Ирина Тошева, повеќе од добро позната дизајнерка, особено кај помладите кои сакаат да се истакнат со својот стајлинг, а сепак да се чувствуваат удобно.
Важите за дизајнерка која најдобро го слуша пулсот на младата генерација. Што би им препорачале на девојките и момците да облечат оваа новогодишна вечер за да изгледаат свечено, а сепак во склад со годините?
Најважно е комбинацијата да биде удобна за да може да се ужива во вечерта. Новогодишната ноќ дозволува да се игра со боите и модните додатоци, но мора многу да се внимава да не ве поистоветуваат со новогодишната елка. Бидете посебни, но немојте да го загубите својот идентитет.
Веднаш потоа следи низа празници и домашни забави за кои исто така треба да бидеме празнично дотерани. Што препорачувате да се облече на домашна семејна прослава?
Интересни кошули или фустани со едноставен крој, надополнети со убав накит се секогаш добитна комбинација за семејните прослави. Покомотната гардероба ќе ви дозволи да изедете нешто повеќе, а тоа да не се познае.
Кое парче би го издвоиле што задолжително ќе го носите или би сакале да го носите на новогодишната прослава?
Деновиве беше промовирано празничното продолжение на мојата колекција за оваа сезона, Мементо Мори 2.0, во соработка со Design & berries. Некое од парчињата и накитот задолжително ќе ги носам на новогодишната ноќ како и семејните прослави кои следуваат.
Фото: Facebook Irina Tosheva
Aвтор: Александра Спасеска
