Грижа за косата

„Трудете се постојано да ја одржувате својата коса во најдобра форма!“

Ако косата не е соодветно негувана таа станува сува и го губи сјајот. Изложувањето на сонце, хемиските третмани на косата – мини-вал, избелување, фарбање, сушењето со фен, прекумерната употреба на пегли и фигара, централното греење – сето тоа ја суши косата и ѝ ја одзема природната влажност. Ако редовно не ја кратиме косата, влакната се кинат и косата цвета. Урамнотежената исхрана, свежиот воздух, движењето и добрата општа здравствена состојба поволно делуваат на растот на косата. Исто така, важен е и добриот сон бидејќи во текот на спиењето циркулацијата се подобрува а со тоа и исхраната на коренот на косата.

Нега на косата според типови на коса:

Мрсна коса

Доколку лојните жлезди во кожата на главата прекумерно лачат себум, масна супстанца што го обвиткува влакното, косата станува мрсна. Влакната губат сјај и делуваат безживотно. Мртвите клетки од кожата и прашината од воздухот лесно се лепат на маснотијата и затоа имаме потреба ваквата коса почесто да ја миеме. Како и да е, најдобро е да не ја миете косата секојдневно бидејќи честото миење може да предизвика уште поголемо лачење на себум. Користете шампон и регенератор специјално наменети за мрсна коса. Овие производи се направени да помогнат да се отстрани нечистотијата и маснотијата но се доволно благи и нежни за да не ја поттикнуваат работата на лојните жлезди. Внимателно ја мијте косата и избегнувајте грубо триење бидејќи тоа исто така ќе поттикне излачување на себум. Најдобро е регенераторот да го користите само на врвовите и да ги избегнувате корените, или доколку го ставате на целата коса, употребете многу мала количина. При миењето, косата на крајот можете да ја исплакнете со вода во која сте додале малку јаболков оцет или лимонов сок за да се поврати природната киселост и косата да добие сјај. Избегнувајте комбинирани производи – 2 во 1 шампон и регенератор, третмани со масла и силиконски капки. Обидете се да избегнувате допирање и играње со вашата коса, често чешлање итн. бидејќи сето тоа придонесува таа побрзо да се мрси.

Сува коса

Косата е сува кога лојните жлезди не лачат доволно себум кој ги подмачкува влакната. Косата станува крута, кршлива, нееластична и цвета на краевите. Состојбата уште повеќе се влошува со прекумерно изложување на сонце, употреба на хемикалии или често миење на косата. Во основа, на сувата коса и недостасува влага. Користењето на производи за кондиционирање на косата е наједноставниот начин да се третира сувата коса. Косата е најчесто најсува на врвовите така што треба на нив да се концентрирате. Доколку не користите регенератор кој не се мие, оставете го регенераторот да делува на косата најмалку пет минути пред да го измиете. Косата не треба да се мие секој ден туку два до три пати неделно со силни производи за кондиционирање. Барајте производи кои содржат алое вера, витамин Е и пантенол. Сушењето со фен дополнително ја суши сувата коса и затоа треба да бидете многу внимателни – да не биде премногу топол и да не го држите премногу блиску до главата. Постојано движете го фенот за да не изложувате делови од косата на прекумерно сушење и усмерете го во правецот на растот на косата за таа да се израмни и скроти.

Нормална коса

Нормалната коса е сјајна и здрава како резултат на добрата здравствена состојба и правилната нега на косата. Во негата на нормалната коса треба да се внимава да не се наруши нејзината природната рамнотежа и затоа треба да се користат благи, pH  неутрални или pH кисели шампони. Косата не треба да се мие премногу често туку само кога има потреба. Одговараат шампоните наменети за сите типови на коса кои содржат корисни додатоци како витамини и аминокиселини, екстракти од чаеви, разни полезни растенија, тинктура од кана итн.