Ви ја претставуваме најновата песна и видеоспот на македонскиот музичар Илија Ќосевски…
Илија Ќосевски е роден во Штип и со музика има започнато да се занимава уште на 5 годишна возраст. Најпрво започнал да свири на виолина, но набргу открил дека чувствува поголема љубов кон флејтата, па така го избрал овој инструмент за главен за време на основното музичко училиште во Штип. Во овој период за прв пат го покажува својот музички талент, кој во комбинација со напорната работа и љубов кон музиката му носи бројни награди и успеси, од кои како позначајни ќе ги истакнеме двете втори и трети места на државните натпревари.
Тоа било одличен поттик и патоказ во животот дека музиката е таа која ќе ја формира неговата емпирија, па следно било запишувањето во средното музичко училиште во Штип „Сергеј Михајлов“, каде што се определува за Традиционалните Македонски народни инструменти, под водство на професорот Горан Ангелов – Гајда.
По завршувањето на средното образование се запишува на Факултетот за музичка уметност во Скопје и дипломира на отсекот Народни инструменти, кај проф. Драган Даутовски. Илија денес е професор во средното музичко училиште „Сергеј Михајлов“ во Штип и денес стекнатото знаење од традиционалната Македонска народна музика им го пренесува на деца од 7 до 18 години.
Со популарната музика и творењето на популарна музика започнува да се бави на 17 години и во 2007 г. го има својот прв настап како дебитант на Макфест. Наредната година има нов настап на Макфест, а во 2009 Сања Лечкова ја изведува неговата песна „Душа уморна“, по што следуваат настапи на фестивалот ФЕШТА, за да во 2011-та стигне и до победеа со песната „Ангели и демони“на Зоран Илиев, каде се јавува како аранжер.
Она кое што ние денес ќе ви го претставиме е неговиот прв видео запис за песната „ТЕ ИЗГУБИВ“, која е посветена на неговиот покоен татко. Во видеото и во песната се раскажува за неговиот живот со него и чувствата и емоциите кои се предизвикани од загубата.
Мислиме дека сите љубители на македонската забавна музика навистина ќе уживаат во убавите оригинални звуци на Илија, пропратени со длабоките емоции и лирики кои песната ги носи со себе.
Ние го поздравуваме Илија, а вам ви посакуваме да уживате во песната.
{youtube}Bg5nmX6beF4{/youtube}
