Тајна откриена векови подоцна – што се случило со Богородица по Воскресението на Исус Христос?

По Воскресението, Исус Христос им се појавувал на повеќе луѓе во текот на следните 40 дена, меѓу нив и на својата мајка, Пресвета Богородица. Таа била сведок на неговото страдање и распнување, а според Евангелието, тој му ја доверил грижата за неа на апостол Јован Богослов, нарекувајќи ја симболично „мајка на сите верници“.

За неа знаеме дека била ќерка на Јоаким и Ана, и дека била свршена со сиромашниот дрводелец Јосиф. Исто така, добро е познато дека Пресвета Богородица, пред да стапи во брак, зачнала од Светиот Дух и го родила Исус во Витлеем.

Но, што се случило со неа по распнувањето на Христос?

Последен пат се споменува по име во Новиот завет како единствената жена присутна заедно со апостолите во горната одаја по Вознесението. Овој настан се смета за денот кога е основана Христијанската црква и се одбележува како Педесетница.

Светото предание вели дека Јован Богослов го сфатил многу сериозно своето „посинување“ и се грижел за Марија до крајот на нејзиниот живот.

Нејзиниот живот не е опишан во канонските текстови, но според црковното предание, таа живеела во куќа на Сион, која ѝ ја обезбедил Јован.

Помагала на болни и сиромашни, а се верува дека починала на возраст од 60 или 72 години.

Православната црква учи дека Христос ја зел нејзината душа, а потоа и телото, три дена по смртта – настан познат како Успение на Пресвета Богородица.

Иако некои веруваат дека живеела во Ефес, посилни се доказите за нејзиниот престој и погреб во Ерусалим, во Гетсиманија, каде денес се наоѓа и нејзиниот гроб – едно од најзначајните христијански светилишта.

Една легенда вели дека при посета на Атос, Богородица била восхитена од убавината и замолила тоа да биде нејзин духовен дом. Така Света Гора станала позната како „Градината на Богородица“, каде до денес не е дозволен пристап за жени.