Кои се симптомите на рак на желудникот? Болеста со која се бореше Саша Поповиќ
Карциномот на желудник, болеста од која почина Саша Поповиќ, е карцином кој потешко се открива, бидејќи не дава специфични симптоми, а раното откривање е пресудно за лекување.
Според српските медиуми, Саша Поповиќ, основачот и креативен директор на Гранд продукција, помалку од една година водел тешка битка со една од најопасните и подмолните болести – ракот на желудникот.
Ракот на желудникот спаѓа во групата на карциноми кои е тешко да се откријат навреме, бидејќи во раните фази не предизвикува специфични симптоми. Навременото дијагностицирање е од клучно значење за успешно лекување, но, за жал, многу пациенти го откриваат карциномот дури во понапредната фаза.
Кои се симптомите на рак на желудник
Симптомите на рак на желудник често се неспецифични и може да се помешаат со други гастроинтестинални нарушувања. Некои од најчестите симптоми вклучуваат:
Чувство на печење во горниот дел на стомакот и градите, кое може да биде придружено со киселини и гадење.
Постојана болка во стомакот – нејасна, долготрајна или хронична болка во абдоменот која не поминува.
Чувство на рана ситост – пациентот брзо се чувствува сит и после многу мал оброк.
Надуеност и проблеми со варење – чести дигестивни проблеми, подригнување и чувство на тежина по јадење.
Губење на апетит и телесна тежина – без очигледна причина, што може да укаже на сериозна болест.
Мачнина и повраќање – особено ако во повратената содржина има траги од крв.
Крв во столицата – темна столица може да биде знак на внатрешно крварење.
Жолтица – пожолтување на кожата и белките на очите, што може да укажува на ширење на ракот кон црниот дроб.
Отекување на абдоменот – зголемување на обемот на стомакот поради насобрана течност.
Ризик-фактори
Неколку фактори можат да го зголемат ризикот за развој на рак на желудник, меѓу кои најважни се:
Инфекција со Хеликобактер пилори (Helicobacter pylori) – бактерија која може да предизвика хроничен гастритис и улцерации.
Нездрава исхрана – прекумерна консумација на солена и преработена храна богата со нитрати.
Гастритис и хронични чиреви – долготрајни воспаленија на слузокожата на желудникот.
Пушење и алкохол – овие навики значително го зголемуваат ризикот од рак.
Генетска предиспозиција – ако во семејството има случаи на рак на желудник, ризикот е поголем.
Старост – почеста е појава кај луѓето над 55 години.
Група на крв – истражувањата покажуваат дека луѓето со крвна група А имаат зголемен ризик за рак на желудник.
Дијагноза на рак на желудник
Навременото откривање на рак на желудник е од витално значење за успехот на третманот. Некои од најчестите дијагностички методи се:
Ендоскопија (гастроскопија) – користење на тенка, флексибилна цевка со камера за преглед на внатрешноста на желудникот.
Биопсија – земање на ткиво од сомнителната област за лабораториско испитување.
Компјутеризирана томографија (КТ) и магнетна резонанца (МР) – овие техники овозможуваат подобар преглед на туморот и неговото ширење.
Анализа на крвта – одредени маркери може да укажат на постоење на рак.
Третман на рак на желудник
Лекувањето на рак на желудник зависи од стадиумот на болеста, општата состојба на пациентот и присуството на метастази. Најчестите методи на третман вклучуваат:
Хируршко отстранување на туморот – ако ракот е откриен во рана фаза, дел од желудникот или целиот желудник може да биде отстранет.
Хемотерапија – користење на цитостатици за уништување на канцерогените клетки.
Радиотерапија – зрачење на туморот за да се намали неговата големина и да се спречи растот.
Имунотерапија и таргетирана терапија – нови методи кои го поттикнуваат имунолошкиот систем на организмот да се бори против ракот.
Превенција
Иако не постои сигурен начин за превенција, следниве мерки можат значително да го намалат ризикот од развој на рак на желудник:
Здрава исхрана – консумирање свежо овошје, зеленчук и храна богата со антиоксиданси.
Избегнување на солена и преработена храна – намалување на внесот на нитрати и конзерванси.
Контрола на Хеликобактер пилори – редовни прегледи и третман доколку е потребно.
Избегнување на алкохол и пушење – значително го намалуваат ризикот од рак на желудник.
Редовни лекарски прегледи – особено за оние со фамилијарна историја на болеста.
Ракот на желудник е сериозна и подмолна болест која често останува незабележана во раните фази. Навременото препознавање на симптомите и редовните медицински контроли се од клучно значење за успешно лекување. Со здрав начин на живот, правилна исхрана и избегнување на ризични фактори, значително може да се намали ризикот од развој на оваа болест.
