Изберете еден ден во неделата кој ќе ви биде за тестенини, а сепак здрав оброк кој ќе ви ги нахрани и телото и душата.
Потребни состојки:
- 1/2 помал праз
- 100 грама шунка
- 200 грама спанаќ
- 250 грама тестенини
- 1 домат
- 1 лажичка ајвер
- 2 чешниња лук
- 100 грама тврдо сирење
- Масло, сол, бибер
Ако сакате прелијте и запечете со:
- 2 лажички кисела павлака
- 2 јајца
- 50 милилитри млеко
Начин на подготовка: Сварете ги тестенините, процедете ги и ставете им малку масло за да не се залепат. Во посебен сад на масло запржете го сечканиот праз, додајте ја сечканата шунка и запржете ги, па потоа ставете го варениот и исечкан спанаќ, лукот, солта и на крајот исечканиот домат. Тестенините распордете ги во мал сад за печење, па ставете им коцкички сирење.
Тестенините можете да ги јадете на овој начин, а ако сакате да ги запечете во рерна, тогаш во посебна чинија изматете 2 лажички кисела павлака, 2 јајца и малку млеко. Сето тоа добро измешајте го и прелијте преку јадењето. Добро растресете за павлаката да влезе помеѓу тестенините. Печете на загреана рерна од 200 степени Целзиусови, околу 30 минути, за добро да се запече, а ако треба продолжете го печењето.
Совет плус: Имајте предвид дека за да не ви се залепат тестенините, треба да додадете сол во водата во која ќе ги варите, а тоа ќе им даде и подобар вкус. Ако сепак се решите да ги подготвите тестенините на друг начин, овој совет ќе ви биде од корист затоа што солената вода од варените тестенини е одличен додаток за сос, благодарејќи на скробот кој дополнително ќе го згусти.
