Не постои значителен ризик да се заболи од новиот коронавирус преку користење на книжни и метални евра, соопшти денеска Европската централна банка (ЕЦБ).
Како што се наведува, тоа е утврдено со лабораториско испитување кое покажа дека вирусот преживеал многу подолго на други површини, пренесува порталот Локал Франс.
Готовината и натаму се користи во 19 земји од еврозоната, меѓутоа бројни продавници бараат од купувачите да се префрлат на бесконтактно плаќање за да се избегне ракување со банкноти и можен контакт со инфицирано лице.
Член на извршниот одбор на ЕЦБ Фабио Панета рече дека испитувањето во лабораторија покажало дека стапката на преживување на вирусот е 10 до 100 пати поголема на челични површини, како кваки на вратите, отколку на банкнотите и монетите.
– Други анализи покажале дека вирусот потешко се пренесува преку порозни површини како памучни и ли хартиени, отколку преку мазните површини како што е пластика, рече Панета додавајќи дека евробанкнотите печатени на хартија од памучни влакна што ги прави отпорни на абење.
Панета заклучи дека банкнотите не претставуваат ризик од инфекции во споредба со други видови површини со кои секојдневно луѓето доаѓаат во контакт.
Повеќе од 340 милиони жители на Европа користат евро, а готовината е доминантен начин на плаќање и посебно е популарен во Германија, Франција и Шпанија, соопшти ЕЦБ.
