Во овој балкански град нема заразени – корона вирусот ги заобиколи само заради една причина
Во хрватскиот град Вировитица нема да сретнете ниту еден човек на улица, а надлежните со мерките реагираа пред другите.
Популацијата во оваа област во Славонија е многу дисциплинирана и ги слуша препораките на стручните лица.
Во ова гратче во парковите нема да видите како си играат деца, а на улиците нема луѓе кои се шетаат и возат велосипеди.
За разлика од некои други места, во Вировитица граѓаните веќе подолго време влегуваат во продавниците еден по еден, а на влезот се проверува дали ги дезинфицирале рацете. Истото се случува во и пред банките – пензионерите влегуваат еден по еден, и држат растојание меѓу себе.
Директорот на Институтот за јавно здравје на округот Вировитица-Подравина, епидемиолог Мирослав Венус за хрватските медиуми изјави дека досега се земени 38 примероци за тестирање на вирусот корона, од кои 33 се негативни, а за пет се уште ги чекаат резултатите.
Од штабот за цивилна заштита велат дека клучен потег е откажувањето на најголемиот економски настан – „Виро експо“, кој собира 30 000 луѓе. Саемот требаше да се одржи од 13 до 15 март.
Тоа е најзначајниот настан за оваа област, но одговорните без да размислуваат го откажале. Тие успеале да ги убедат своите граѓани за сериозноста на состојбата и придржувањето кон мерките на Штабот, поставиле и полициски пунктови за оние што влегуваат во округот да проверат дали ја нарушуваат самоизолација. И овие мерки биле успешни.
Докторот Венус посочи дека сите влезови во болницата биле затворени, освен оној, каде што се наоѓал тријажниот контејнер. Тој исто така изјави дека постои и амбуланта за „ковид-19“ со лесна клиничка слика, која работи така што доаѓаат луѓе со автомобилот од кој не излегуваат, а потоа медицинските лица земаат брис и ги испраќаат дома во самоизолација, сè додека не ги добијат наодите.
