Виктор Исјановски починал во Грција, Камењар сподели фотографија од таверна каде наздравуваат со Перо Антиќ

Тажна вест ја потресе македонската јавност попладнево. Почина д-р Виктор Исјановски, психијатар и поранешен директор на Здравствен дом – Скопје.

Неофицијално, Исјановски починал во Грција, каде што престојувал на летување. Вчера на социјалната мрежа Инстаграм Владимир Ристов – Камењар сподели фотографија од Таверна Фарос каде што е во друштво со д-р Исјановски и со кошаркарската легенда Перо Антиќ.

Фото: Инстаграм

Д-р Исјановски беше на чело на најголемата здравствена установа во државата од јуни 2019 до 2024 година. Јавноста најмногу го памети по неговиот ангажман за време на пандемијата на коронавирусот, кога Здравствен дом – Скопје со сите ресурси беше ставен во служба на граѓаните, особено во процесот на масовната вакцинација.

Роден е на 21 јули 1978 година во Скопје, каде ги завршува основното и средното образование. Медицинскиот факултет го завршува во 2003 година, а дел од студиите поминува и на Универзитетот во Мајами, Калифорнија, САД.

Својата професионална кариера ја започнува во 2004 година во Казнено-поправната установа Идризово, а од 2006 година е дел од ЈЗУ „Психијатриска болница Скопје“, каде во 2007 година ја завршува специјализацијата по психијатрија. Во 2018 година е избран за раководител во оваа институција.

Магистерските студии на Медицинскиот факултет ги завршува со просек 10, а трудот на тема „Улогата на некои ризик фактори во етиопатогенезата на шизофренијата“ го брани со највисоки оценки. Беше избран и за асистент на Катедрата по психијатрија при Психијатриската клиника во Скопје.

Д-р Исјановски зад себе остава сопруга и две деца. Неговата ненадејна смрт претставува голема загуба за медицинската заедница и за сите кои го познаваа.