Таксистот Бранко му донираше бубрег на другар од училишните клупи: „Веќе не сме пријатели, сега сме браќа“
Делото на Бранко Џаламиќ (43) од Богатиќ пред неколку дена воодушеви многумина. Храбар таксист донираше бубрег на својот училишен другар.
Бранко, кој седел со Синиша во училишната клупа, вели дека кога слушнал дека на Синиша му го извадиле едниот бубрег, а другиот престанал да работи, во ниту еден момент не помислил дали да му го даде својот.
„Само се молев да ги поминам анализите и тестовите што е можно поскоро и да можам да го направам тоа. Првото нешто што ми падна на ум, кога докторите дојдоа да ме видат, беше како е тој. Само што му го пресадиле бубрегот, телото веднаш го прифатило и почнал да работи“, раскажува Бранко за РТС.
За тимoт лекари, преведувачи и вработени во клиниката во Турција, средбата на двајца пријатели по трансплантацијата беше особено трогателна.
„Бев зачуден, не можев да поверувам. Ни најблиските не ми излегоа во пресрет да ми го понудат тоа што ми го понуди. Затоа отидовме кај него дома, отидовме на прегледи, дојдовме овде и се на се, за седум дена решивме да дојдеме во Турција“, вели Синиша Новаковиќ.
„Веќе не сме пријатели, ние сме браќа“
Пријателите биле во Истанбул со своите сопруги. Сето ова што се случи дополнително ја зацврсти нивната врска.
Тие го опишуваат со зборовите: „Веќе не сме пријатели, сега сме браќа“.
Славица Новаковиќ, сопругата на Синиша, вели дека пред трансплантацијата повеќе време поминувале во болница отколку дома.
„Ова сега е нешто ново за нас. Треба да се навикнеме на се и да се вратиме на нашиот нов живот“, посочува Славица.
Соња Џаламиќ, сопругата на Бранко, објаснува дека на почетокот, грижејќи се за Бранко, била во шок кога сопругот и рекол дека сака да му даде нов живот на пријателот.
„Но, кога ја разгледавме ситуацијата, станавме свесни дека повеќе нема да ги има овие здравствени проблеми. Јас и децата го поддржавме. Најважно е тие двајца да бидат среќни и насмеани“, посочува Соња.
