„Почивај во мир, најдобриот студент што сме го имале“, професорот Цури се прости од Фросина

Граѓаните излегоа на протест на улицата Партизански одреди, кадешто 20-годишниот Васил Јованов завчера ја усмрти 22-годишната Фросина Кулакова.

Се оставаат цвеќиња и се палат свеќи крај фотографијата на Фросина, а демонстрантите носат транспаренти на кои пишува: „Врските не враќаат човечки животи“, „Сите одиме кај ист судија, а таму има само една правда“, „Уште колку?“.

Граѓаните бараат казни и промени.

Според информациите од Обвинителството, Јованов возилото го управувал пијан, без возачка дозвола и поминал на црвено светло.

Младата Фросина Кулакова од Неготино која прерано го загуби животот кога на неа налета возач и ја прегази на пешачки премин на булеварот Партизански Одреди, денеска ќе биде испратена во вечниот дом.

Реномираниот моден дизајнер Изет Цури, кој децении активно работи на француската модна сцена е професор на 22 годишната Фросина Кулакова од Неготино која беше усмртена на пешачки премин на булеварот „Партизански одреди“.

Фросина пред само седум месеци ја воодушеви јавноста со нејзините модели на годишната ревија на Интернационалниот институт за мода „Изет Цури“ каде студираше.

Преку социјалните мрежи, со заедничка фотографија, од Фросина се прости Изет.