Овие граѓани месецов добиваат 4.000 денари покачување на платите

Министерката за образование и наука Весна Јаневска изјави дека зголемување на платите во образованието од седум проценти ќе има во април и оти тоа, покрај за наставниот кадар, ќе важи и за сите вработени во основните и средните училишта.

-За жал се појавија бројни шпекулации на социјалните мрежи дека нешто не е во ред со покачувањето на платата.

Тоа не е точно, одговорно тврдам дека и оваа година, како и претходните, наставниците ќе си добијат поголема априлска плата за 7 проценти, рече министерката Јаневска одговарајќи на новинарско прашање пред одржувањето на третиот Женски Економски Форум во Скопје.

Таа дополни покачувањето ќе важи и за сите останати вработени во училиштата и во основното и во средното образование.

Во вечерашната емисија „Бизнис21“ на ТВ „21“, и претседателот на Конфедерацијата на слободни синдикати (КСС), Благоја Ралповски, објави дека просветните работници ќе добијат усогласување на платите од 7 отсто, што според него би требало да резултира со покачување од околу 4.000 или 4.500 денари.

„Околу 4000-4500 денари зголемување ќе добијат просветните работници“, изјави Ралповски, нагласувајќи дека ова покачување е резултат на долгогодишните напори за подобрување на условите за наставниците и останатиот образовен кадар.