Лекар истакнува што никако не смее да се игнорира за време и по јадење – тоа го чинеше живот прочуениот продуцент!

Познатиот музички продуцент и долгогодишен директор на „Гранд продукција“, Саша Поповиќ, почина по кратка, но тешка борба со рак на желудникот. Неговиот пријател и кум Ќира откри дека Поповиќ немал вообичаени предупредувачки знаци и дека ниту магнетната резонанца не покажала постоење на малигнитет.

– На крајот, дијагнозата ја дозна дури кога му беше скршена ногата, а лекарите забележаа дека коската не зараснува – изјави тогаш Ќира.

Тивка болест со сериозни последици

Стручњаците предупредуваат дека токму ненаметливоста на симптомите е еден од најголемите проблеми кај ракот на желудникот. Проф. д-р Дино Тарабар, гастроентеролог и онколог, истакнува дека повеќето пациенти со оваа болест не се соочуваат со јасни знаци сè додека таа не напредува.

– Кај најголемиот број пациенти, ракот на желудникот се развива целосно без симптоми. Успешноста на лекувањето зависи од раната дијагноза и навремената терапија – нагласува д-р Тарабар во изјава за порталот eKlinika.

Најчестиот тип на рак на желудникот е аденокарцином, кој се појавува во 95% од случаите. Симптомите често се неспецифични и можат да се помешаат со обични дигестивни тегоби. Првите знаци може да бидат: чувство на ситост пред јадење, болка во стомак по јадење, гадење и чувство на надуеност.

Но, д-р Тарабар предупредува дека постојат симптоми кои никако не смеат да се игнорираат.

– Ургентни знаци се темна или катранеста столица, како и повраќање крв. Ако пациентот има и тешкотии со голтање, анемија, губење на апетит и неочекувано губење на тежина, можно е болеста веќе да е во напредна фаза – истакнува тој.

Дијагноза и третман – што е клучно?

За потврда на дијагнозата, потребно е да се направи гастроскопија, особено кај лица над 45 години. Овој преглед овозможува земање примерок од ткивото за патохистолошка анализа, со што се утврдува дали постојат малигни промени.

Доколку ракот е локализиран само во желудникот, оперативниот зафат е примарен метод на лекување.

– При отстранувањето на дел од желудникот, се вадат и околните лимфни јазли – најмалку 25, за да се процени дали болеста се проширила. Врз основа на анализата, се одлучува за понатамошна хемотерапија – објаснува д-р Тарабар.

Во случај на рак со метастази, хемотерапијата останува единствената опција. Напредокот во медицината доведе до користење на биолошки терапии во комбинација со цитостатици, што го подобрува квалитетот на животот на пациентите.

Превенција – најважното оружје во борбата

Д-р Тарабар нагласува дека превенцијата е клучна во намалувањето на ризикот од рак на желудникот. Избегнување на алкохол и тутун, здрав начин на исхрана и одржување на соодветна телесна тежина играат значајна улога.

– Инфекцијата со бактеријата Helicobacter pylori може да придонесе за развој на оваа болест, па затоа е важно навреме да се третира – истакнува тој.

Како пример за успешна рана детекција, ја наведува Јапонија, каде 60% од случаите на рак на желудникот се откриваат во почетна фаза, благодарение на редовни здравствени прегледи.

– За жал, кај нас повеќето пациенти доаѓаат кај лекар кога болеста веќе е во поодмината фаза. Потребно е да се подигне свеста за важноста на превентивните прегледи, бидејќи раното откривање е единствениот начин за успешно лекување – заклучува д-р Тарабар.