Еве кога пензионерите ќе добијат ново зголемување на пензиите!
Од септември 2025 година, пензиите повторно ќе се усогласуваат 50% според индексот на трошоците на животот и 50% според порастот на просечно исплатената плата.
Во текот на последните девет месеци, пензионерите добија вкупно зголемување на пензиите од 5.000 денари. Првото зголемување од 2.500 денари се реализираше во септември 2024 година, а второто, исто така од 2.500 денари, во март 2025 година. Со ова, најниската пензија во март 2025 достигна 18.192 денари, а просечната 26.258 денари .
Од септември 2025 година пензиите ќе се усогласуваат според старата методологија, која ги зема предвид инфлацијата и растот на платите . Ова значи дека идните зголемувања ќе зависат од економските показатели, а не од фиксни износи.
За 2025 година, во Буџетот се предвидени 47.8 милијарди денари за исплата на пензии, што претставува зголемување од 8 милијарди денари во споредба со 2024 година . Ова обезбедува стабилност на пензискиот систем и редовна исплата на пензиите.
Пензионерите можат да очекуваат редовни усогласувања на пензиите според економските услови, што ќе обезбеди одржливост на пензискиот систем. Иако нема најави за нови фиксни зголемувања, постојат уверувања дека пензиите ќе се зголемуваат во согласност со инфлацијата и растот на платите.
Да продолжи линеарното покачување на пензиите – пред неколку дена побараа пензионерите од Штип и Свети Николе. Децидни дека ако се промени, односно не се покачуваат пензиите линеарно тие нема да излезат на гласање, а ќе се организираат и нови протести низ дражавата. Освен ова пензионерите имаат и низа други барања.
„Нашите барања се законот кој го имаме предложено да се усвои, сите претседатели да се променат, да се воведат картички за секој пензионер, како и линеарно покачување на пензиите.“ – вели Митев.
Бараат и средба со премиерот Мицкоски со цел да се направи контрола во здружението на пензионери, но на дневен ред да се стави и точката со покачувањето односно усогласување на пензиите.
„Јавно бараме исклучиво премиерот да се заложи да ја прими делегацијата на пензионерите. Средбата е бидејќи се врши проневера во здружението на пензионерите.“ – вели Станојков.
