Беа во цивилка, не знаев дека се полициска придружба: Сашко Коцев не застанал на даден знак од полицијата, по што удрил во полицаец и избегал

Познатиот македонски актер Сашко Коцев вчера вечерта околу 19 часот и 15 минути во Скопје, на подрачјето на Центар управувајќи патничко моторно возило „фолксваген“ со скопски регистерски ознаки не застанал на знак на запирање, даден од полициски службеник кој извршувал службени дејствија, агресивно се однесувал, по што со возилото го удрил полицискиот службеник и го напуштил местото, потврдија од МВР за „Слободен печат“.

Се преземаат мерки за расчистување на случајот, додаваат од МВР.

Актерот Коцев за „Слободен печат“ изјавил дека не го удрил полицаецот со своето возило, ниту пак знаел дека се работи за полиција.

– Не ги видов дека биле полицајци. Беа во цивилка, не знаев дека се полициска придружба. Не беа униформирани. Јас ги прашав кои сте вие да блокирате пат и си продолжив со возилото, а тој ми одговори „сега ќе видиш кој сум“. Јас брзав, детето ми плачеше позади. Но, не го удрив, тој се поттргна, рекол Коцев за „Слободен печат“.