Македонец од Кочани најден мртов во Љубљана, полицијата истражува дали бил претепан

Амбасадата на Република Северна Македонија во Љубљана информира дека добила известување од словенечката полиција дека во текот на ноќта на 2 октомври 2025 година, животот го загубил македонски државјанин, роден во 1986 година во Кочани.

Согласно информациите од словенечката полиција, блиските на починатиот се веќе известени, а случајот го разгледува Секторот за криминалистичка полиција.

Амбасадата на Република Северна Македонија во Љубљана извести дека е во контакт со семејството на починатиот и со надлежните словенечки институции, со цел обезбедување на потребната конзуларна поддршка и следење на понатамошниот тек на постапката.

Полицијата и обвинителството во Љубљана се уште го истражуваат случајот со смртта на 38-годишниот македонски државјанин кој рано утрово минатиот четврток беше најден мртов на улица во главниот град на Словенија. На телото се врши обдукција, а се прибираат и други информации и траги.

Првичните неофицијални информации се дека 38-годишниот маж бил претепан до смрт, но од полицијата официјално изјавија дека се врши истрага која треба да ја открие причината и да ги утврди околностите во кои починал државјанинот на Македонија.

-Полициските службеници извршиле увид на местото на настанот, наредена е судска обдукција, но причината за смртта сè уште не е разјаснета. Интензивната кривична истрага сè уште е во тек. Надлежното државно обвинителство ќе биде известено за сите наоди“, изјави во петокот попладне, Шпела Шкопорц, портпаролката на словенечката полиција.

Полицијата веднаш по отварањето на истрагата го утврдила идентитетот и државјанството на починатиот маж.