Штип под едно небо: Светлината на сеќавањето не згаснува
Светлината на овие животи нема да згасне - Македонија не заборава!
Вечерва, на Градскиот плоштад во Штип, „Слобода“, ќе се одржи емотивен настан во спомен на жртвите од трагичниот пожар во дискотеката „Пулс“ во Кочани. Токму денес, на 16 септември, Македонија одбележува точно шест месеци од моментот кога 62 млади животи згаснаа засекогаш, меѓу нив и петмина штипјани.
Настанот започнува во 20:00 часот со палење свеќи, симбол на светлината, љубовта и трајното сеќавање. Во 20:30 часот, сите присутни ќе ги подигнат светилките од своите мобилни телефони кон небото, создавајќи моќна порака, „ѕвездено небо“ во чест на младите кои трагично го загубија животот на 16 март годинава.
Граѓаните се повикани да излезат и заедно да покажат дека болката е заедничка, а сеќавањето вечно.
Инаку, семејствата на загинатите штипјани, како дел од главната организацијата и иницијатива, најавија дека штипјанецот Горан Тонев, кој беше меѓу повредените во трагичниот пожар во дискотеката „Пулс“, вечерва ќе биде дел од настанот во Штип посветен на сеќавањето.
За потсетување, со длабока благодарност за животот, само неколку месеци по кобната вечер во Кочани, Горан за Гламур во месец мај изјави: „Бог ми даде втора шанса – моја должност е да ја живеам со почит кон оние што ги изгубивме.“
Вечерва, присуството на младиот Тонев на плоштадот „Слобода“, ќе биде само уште еден потсетник на силата, болката и надежта што ги запечати оваа трагедија.
