Лоши вести за Македонците со бугарски пасоши

Градското обвинителство во Софија вчера почнало истрага за организирана криминална група што се занимавала со незаконско издавање бугарски државјанства во периодот од почетокот на 2021 до јуни годинава, јавуваат бугарските медиуми.

Во истрагата што ја води Главната дирекција „Борба со организиран криминал“ (ГДБОП) на бугарското МВР е вклучена и Државната агенција за национална сигурност (ДАНС).

Од досега утврденото, постоела организирана шема за противзаконско доделување бугарско државјанство на странци со лажни документи за бугарско потекло.

Истрагата е почната по проверки направени од ДАНС по дојава од 4 март годинава од министерот за правда на Бугарија, Георги Георгиев.

Тој побарал ДАНС да го провери работењето на Дирекцијата „Бугарско државјанство“ во Министерството за правда. Во предистражната постапка, министерството ги доставиле сите побарани информации на ДАНС.

Во оваа акција се прибираат докази за кривични дела и се вршат распити.

Според некои искази на поранешни и сегашни бугарски високи функционери, се смета дека над 120.000 македонски државјани добиле бугарско државјанство и бугарски пасоши. Повеќе детали се очекуваат утре.

Да потсетиме над 216 илјади пасоши со бугарско државјанство се издадени на граѓани на Република Северна Македонија, објави министерот за внатрешни работи Даниел Митов.

„Во периодот од 1 јануари 2007 година до 17 јуни 2025 година издадени се 216.594 пасоши на бугарски државјани за кои има информации за второ државјанство на Република Северна Македонија“, изјави министерот за внатрешни работи. Министерот Митов нагласи дека „основата за издавање бугарски пасош произлегува од стекнувањето на бугарско државјанство од страна на лицата“.

Според Законот за бугарски лични документи, пасошите се издаваат само на бугарски државјани.