Во текот целата наредна седмица нашето подрачје ќе се наоѓа под влијание на топла воздушна маса од југ, која ќе услови и понатаму да се задржи релативно топло време за овој период од годината.
Утре времето ќе биде сончево со мала до умерена облачност, а потоа во следните два дена особено во вечерните и ноќните часови ќе има локални врнежи од дожд, наместа поројни, проследени со појава на грмежи.
Услови за локален дожд ќе има и во четврток во претпладневните часови. За време на прогнозираниот период ќе дува засилен јужен ветер, а температурите ќе бидат во пораст, особено утринските, велат од УХМР.
Сепак, српскиот метеоролог Иван Ристиќ предупредува дека кон средината на месецот доаѓа уште една промена на времето, која ќе започне на 12 март.
„Тогаш во регионот пристигнува студениот арктички воздух како дел од поларниот вртлог и доаѓа до отворање на „виенската врата“. Најверојатно зимата ќе ни се врати во средината на март“, вели Ристиќ.
„Според моменталните временски индекси, во средината на март има услови за пократок и посилен студен бран, што дополнително би ја намалило температурата. Освен на планините, снег не е исклучен ниту во пониските места. Утринската температура ќе се движи од минус еден до пет степени, а максималната ќе биде меѓу пет и десет степени. Тоа веројатно би бил последниот налет на зимата“, додава Ристиќ за српските медиуми.
Пролетните температури може да се очекуваат во последната третина од месецот придружени со наизменична облачност и сонце. Се очекува сушен период, без врнежи.
