Минималната плата ја примаат повеќе од 20 илјади вработени, од кои најголемиот дел работат во мали и микро фирми. Работодавачите сметаат дека минималната плата може да оди и над 500 евра, доколку за тоа се обезбеди реална основа, односно доколку се зголеми продуктивноста.
Висината на минималната плата не може да биде пониска од 57 отсто од висината на просечно исплатената нето-плата во државата, велат синдикалистите.
Работниците да не очекуваат минимална плата од 500 евра велат за телевизија 24 од Конфедерација на синдикалните организации на Македонија.
Тоа што им следува на работниците е загарантиран минималец кој ќе порасне согласно законски утврдената методологија, проблемот велат е и во тоа што според КСОМ работодавачите не се согласуваат да зголемат плата ако владата не субвенционира придонеси.
Дополнителен проблем според синдикалците е и формирањето на комисијата која треба да се формира за да се утврди репрезентативноста на синдикатите кои се дел од ЕСС.
Премиерот Христијан Мицкоски неколкупати изјави дека како Влада ќе прифати тоа што ќе се договорат синдикалците и работодавачите. Прашан за висината на минималната плата во земјава, премиерот Мицкоски истакна дека Владата наскоро ќе формира комисија на која треба да се утврди репрезентативноста на синдикалните претставници во Економско социјалниот совет.
На последниот економско социјален совет владата им кажала на синдикалците и работодавачите дека субвенционирање на плати нема да поддржи.
Од Организацијата на работодавачи пак, велат дека законското услогласување на минималецот согласно новата методологија, од 22.500 на 24.400 денари не би требало да предизвика некои поголеми проблеми во работењето на компаниите.
Ќе извиси ли предлогот од страна на Стопанската Комора на Северозападна Македонија, за зголемување на минималната плата на 500 евра, под услов државата да ги покрие зголемените придонеси за пензиско и инвалидско осигурување, ќе се знае до крајот на месецов, кога и треба да биде донесена конечната одлука за висината на минималната плата. Инаку, сегашниот минималец, кој изнесува 22.500 денари е сума што ја става земјава на дното по висината на минималецот, во споредба со државите од регионот.
