Најнови детали за убиството на двегодишната Данка Илиќ од Бор, ja ставиле во багажник и ја фрлиле на депонија
Полицијата уапси две лица осомничени за убиството на Данка Илиќ, соопшти српскиот претседател Александар Вучиќ на вонредна седница на Владата на Србија, пренесува N1. Потрагата по детето кое исчезна минатиот вторник траеше 10 дена.
Тие го признале убиството, додаде Вучиќ.
Со какви чудовишта си имаме работа… Сега ја водат полицијата до местото каде што го фрлиле телото на детето, истакна Вучиќ.
Данка Илиќ исчезна на 26 март околу 13 часот и 45 минути во Бањско Поље. Истрагата била веднаш покрената и се одвивала низ цела Србија. Сите кои биле во близина на девојчето во моментот на нејзиното исчезнување биле сослушани.
Се појавија разни информации каде се наоѓа, дури и видео од Виена, но сето тоа се покажа како неточно. Дури бевме сведоци на објава на социјалните мрежи, каде тројца од БиХ се пофалија дека знаат каде е Данка, но се работи за лажна објава поради обид за изнуда на 25.000 евра за информација. Тие се уапсени и се чека казна.
Како што потврдија за АТВ, криминалистичката полиција од Бор ги привела работниците на јавното комунално претпријатие „Водовод“ Бор С.Ј.(50) од село Лука и Д.Д.(50) од село Злот.
„С.Ј. е осомничен дека со службеното возило „фиат панда“ на улица „Радомир Патник“ удрил во пешак, двегодишно девојче, при што ја усмртил. Заедно со колегата Д.Д. телото на девојчето го ставиле во багажникот на возилото, по што се упатиле кон дива депонија на „Старобањски пат“ кај Бор, каде телото го фрлиле на десната страна од патот“, вели извор близок до истрага.
С.Ј. е обвинет за сторено тешко кривично дело против безбедноста на јавниот сообраќај, а Д.Д. помош на сторителот по извршувањето на кривичното дело. По апсењето и на двајцата им е одреден притвор до 48 часа.
Истрагата на криминалистичката полиција од Бор укажува дека се се случило на 26 март околу 13.52 часот, односно само седум минути откако девојчето исчезнало.
„С.Ј. е обвинет дека не ја приспособил брзината на возилото на состојбата и условите на патот, поради што со предниот десен дел од возилото удрил во девојчето и ја убил“, вели извор од истрагата.
Данка Илиќ исчезна на 26 март околу 13.45 часот во Бањско Поле кај Бор. Кога исчезнала била со мајка и и брат и оттогаш и се губи секаква трага. Поради нејзиното исчезнување, за прв пат во Србија е активиран системот „Најди ме“.
