Само што се врати од Италија: Таа е првата позната личност заразена со корона, модната индустрија загрижена
Откако наодите покажаа дека познатата богаташка и модна инфлуенсерка е позитивна на вирусот кој изминатите седмици е светска тема број еден, модната индустрија е во страв.
Виетнамската инфлуенсерка и богаташка Нга Нгуен (27) минатата недела седеше во првите редови на модните ревии на брендовите Saint Laurent во Париз и Gucci во Милано.
По враќањето од Европа се тестираше од коронавирус, а наодите покажаа дека се заразила. Со оглед на тоа дека модните недели во Париз и Милано ги посетија илјадници модни новинари, уредници, манекенки, инфуенсери, фотографи и вљубеници во модата, јасно е зошто во модната заедница сега владее загриженост.
Нгуен со фотографиите од модните ревии се пофали на Инстаграм, по откако е потврдено дека е позитивна на коронавирус, го избриша профилот. На модната недела таа беше заедно со сестрата Хонг Нхунг (26), која исто така е позитивна на корона вирус, пишува Саут Чајна Морнинг Пост.
Виетнамските медиуми пишуваат дека живее паралелно и во Ханој и во Лондон и дека е ќерка на магнат кој богатството го стекнал со челик. Во Виетнам се потврдени 30 случаи на коронавирус.
На ревијата на модната куќа Сен Лорен имало околу 1000 луѓе, а како што пишуваат странските медиуми, модните уредници и другите посетители на модната недела во Париз и Милано одлучиле да се самоизолираат во своите домови. Уредниците од САД и азиските земји како Сингапур и Тајланд изјавија дека работодавачите им рекле да не доаѓаат на работните места откако се вратиле од Милано. Така 30 највиски уредници во Ел, ИнСтајл и Харпер Базар работат од дома.
Тоа секако, не е само поради познатата инфлуенсерка, туку и поради фактот дека Милано е главниот град на северноиталијанската покраина Ломбардија, во која има најголем број од заболените и починати од коронавирусот во Италија.
Во Париз во текот на неделата на модата забранети се собирање со повеќе од 5.000 лица, па поради тоа се откажани мал број настани.
