Дваесет проценти од мајките што ги дојат своите деца во последните пет години никогаш не го направиле тоа во јавноста, додека 10 отсто рекле дека сакаат, но не се одлучиле на тој потег од различни причини. Тие исто така се плашат од негативната реакција на луѓето, покажуваат резултатите од неодамна спроведеното истражување од страна на Центарот за мајки за доење во јавноста во Србија.
Дури и 20 проценти од испитаниците кои не го дојат бебето на јавно место се изјасниле дека срамот ги спречил да дојат, и сметаат дека тоа се прави само во интимна атмосфера, додека десет проценти од мајките не сакаат тоа да го прават јавно додека другите се чувствуваат непријатно. Иако на прв поглед, фактот дека околу 70% од мајките дојат јавно охрабрува, има уште многу простор за подобрување, вели Јована Ружичиќ од Центарот за мајки.
„Околу 40% од мајките дојат исклучиво во парк, каде што има многу мајки и деца. Бројот на оние што дојат на други јавни места, како што се ресторани, пошта, банки, кина, музеи … е незначителен и можеме да заклучиме дека огромното мнозинство мајки што дојат на јавно место се сепак резервирани исклучиво за места кои се социјално прифатливи за доење и каде што се очекува “.
Кога знаеме дека мајчиното млеко е единствената храна за бебиња која носи исклучиво добри работи како за мајката так и за бебето, содржи хранливи и медицински состојки за растење и развој на детето, дека доењето е добро за мама, тогаш нема причина доењето во јавност да биде “табу”.
Каква е ситуацијата во Македонија?
Истото се случува и кај нас во Македонија. Поразговаравме со неколку мајки од кои некои ни ги кажаа своите непријатни искуства. Една од нив ни раскажа како во еден од најпознатите ресторани во населбата Аеродром во Скопје решила да го дои своето бебе бидејќи плачело и било гладно, а била на роденден кај другарка на нејзината ќерка од градинката, и не сакала да го напушти истиот, па се почувствувала многу непријатно додека го правила тоа.
Ми пријде келнерот и кога виде што правам со моето бебе, најпрво се збуни, а потоа ме замоли да не го правам тоа бидејќи гостите би можеле да се чувствуваат непријатно. Станав и веднаш си заминав од ресторанот. И повеќе никогаш не се вратив на тоа место, ни кажа една мајка.
Други мајки пак, на кои им е непријатно да дојат на јавно место, ако излегува со бебето му спремаат шише со млеко, додека други пак сметаат дека доењето е сосема природна работа и дека нема да го остават детето гладно, без разлика дали се наоѓате во парк, кафуле или ординација.
Инаку, во Македонија за разлика од некои (најчесто поконзервативни) земји, нема закон за забрана на доење на јавни места. Но и покрај тоа што нема на мајките им е потребна поддршка за да го направат тоа.
Македонските лекари сметаат дека доењето е најдобар избор за правилен развој на детето, бидејќи мајчиното млеко има влијание и во подоцнежниот развој на детето, го намалува ризикот од заболувања од алергија, астма, дијабет, гојазност и инфекции и заболување од рак.
На скопската Клиниката за гинекологија и акушерство има предавања за мајките уште за време на бременоста, за важноста на доењето.
Според искуствата на лекарите, 70 проценти од родилките знаат да ги дојат бебињата, но и да се справат со проблемите доколку ги добијат за време на доењето.
Педијатрите ги советуваат младите мајки да практикуваат доење до втората година, а надлежните институции да размислат боледувањето на мајката која дои, да биде и до една година. Тие сметаат дека македонските мајки имаат желба да дојат и во тоа треба да уживаат.
Клинички студии покажаа дека доените бебиња поретко се разболуваат и полесно закрепнуваат. Мајчиното млеко обезбедува емоционална сигурност и намалување на стресот преку тесната поврзаност мајка-бебе.
Доењето исто така доведува до побрз развој на мускулите и коските на лицето, поретки се инфекции на дишните патишта, дијабет и малигни болести.
