Жика искрено за последиците по мозочниот удар – еве со што се бори водителот

Познатиот продуцент и водител Жика Јакшиќ на 20 јуни доживеа мозочен удар, по што беше итно хоспитализиран и опериран.

Денес, повеќе од четири месеци подоцна, Жика се опоравува, но последиците, како што вели, сè уште се чувствуваат, а на главата му останала и видлива лузна од шлогот.

Во првото интервју по тешкиот здравствен предизвик, дадено за телевизијата УНА, Јакшиќ отворено зборува за моментот кога сфатил дека нешто не е во ред.

„Станав едно утро, се истуширав и ништо не забележав сè додека не почнав да се бричам. Чувствував како десната рака да не е моја, а во огледалото видов дека десната страна на лицето ми е спуштена. Не можев ни да зборувам. Веднаш сфатив дека станува збор за мозочен удар“, раскажува Жика.

Од домот веднаш бил одвезен во КБЦ Бежанијска коса, а потоа во болницата „Свети Сава“, каде што лекарите реагирале навремено.

„По 24 часа почнав повторно да зборувам, но како најпијан човек“, додава тој.

По седум дена во болница, следеле месеци рехабилитација и интензивна терапија, благодарение на кои денес може да каже дека закрепнал околу 90 проценти.

„Сè уште пишувам потешко и ја чувствувам десната страна како хендикепирана. Понекогаш ми недостига збор, ми се создава конфузија во главата. Но не се предавам, двапати неделно одам на логопед, правам вежби за меморија, читање и масажа на јазикот, образите и лицето“, открива Јакшиќ.

Жика на социјалните мрежи редовно споделува видеа од својата рехабилитација, со цел да ја подигне свеста за превенција и грижата за здравјето кај луѓето.

„Сакам луѓето да разберат дека со здравјето не се игра. Сè може да се изгуби за неколку секунди“, порачува популарниот водител.