Заврши рокот, поголемиот дел од граѓаните не ги добија средствата од „Мој ДДВ“
Голем број граѓани денеска не ги добија средствата од „Мој ДДВ“, иако денес беше последниот рок за исплата. Ова е прво пробивање на рокот од воведувањето на мерката, која важи за една од ретките што овозможуваат директен поврат на пари кај граѓаните.
Станува збор за редовниот поврат за последниот пресметковен период – јули, август и септември. Средствата треба да се уплатат на трансакциските сметки на корисниците, врз основа на нивните скенирани фискални сметки.
Досега, исплатите редовно пристигнуваа најдоцна до 10-ти во месецот. Со доаѓањето на актуелната влада на ВМРО-ДПМНЕ, рокот беше пролонгиран до крајот на месецот. Сепак, до денешниот ден – последен работен ден од неделата – средствата сè уште не се префрлени, а останува неизвесно дали ќе бидат исплатени од понеделник, 1 декември.
Од УЈП соопштија дека до вчера се исплатени 552 милиони денари, а налозите за уште 370 милиони денари се веќе подготвени. Директорката Елена Петрова објасни дека кај дел од корисниците може да има доцнење поради технички проблеми, како невалидни трансакциски сметки.
