Во Црна Гора 1200 евра плата за сезонска работа, во Охрид – максимум 500! И тоа без храна и сместување

Многу наши сограѓани и оваа година ќе заминат на сезонска работа во Хрватска или Црна Гора каде платите се многу поголеми.

Па така овие денови актуелен е еден оглас за работа во Црна Гора во хотел со три ѕвездички што го објавија и некои наши медиуми (најпво беше објавен на српскиот Телеграф), а во кој се бара келнер или келнерка за сезонска работа од 1 јуни до 1 октомври.

И како што пишува во овој оглас што го објави и српскиот Телеграф, за оваа работа во овој хотел плаќаат месечно 1200 евра.

Фото: Фрипик

Ова е идеална прилика за сите оние што бараат сезонска работа, а за истата и не бараат големо работно искуство.

Покрај платата од 1200 евра, обезбедено е и сместување, како и по два оброка дневно, така што ова оваа позиција е идеална за сите кои не се од Црна Гора и кои сакаат да заработат во текот на летото.

Фото: Гламур

Работно искуство е пожелно, но не е задолжително

И бидејќи овој оглас беше објавен на еден српски сајт за огласи (види тука), провериме што се случува и кај нас.

Па така на еден од нашите најпознати интернет огласници, наидовме на оглас од Охрид каде еден познат хотел бара рецепционер и собарка, а платата е од 30.000 до 35.000 денари.

Огласот може да го погледнете тука, но во него нема да најдете повеќе информации, освен броеви за контакт.

Она што го пишува е само дека се работи во две смени, но никаде не е наведено дали нудат и сместување, што би било пожелно за оние што не живеат во Охрид, како што е случајот со огласот од Црна Гора.

Фото: Пексел

Плати и до 3000 евра?

Инаку, на Црна Гора во текот на претстојната сезона ќе и бидат потребни најмалку околу 20.000 сезонски работници во угостителството и туризмот, додека во Хрватска преку 60.000.

Што се однесува до платите, тие за некои позиции можат да се движат и до 3000 евра, посебно во Хрватска, додека за пониски позиции како келнер, рецепционер или собарка платата почнува од 1000 евра.

Од овие причини многу наши сограѓани во текот на летните месеци заминуваат да работат на овие дестинации, а како што велат некои од нив, во овие земји не само што е поголема платата, туку и се работи еден ден помалку, за разлика од тука.

„Во Хрватска не работиме нон-стоп, односно се работи минимум еден ден помалку во неделата отколку во Македонија. И затоа погледнете ги продавачките во нашите маркети, сите се истоштени од напорната работа. Работат како робови, а со платата одвај врзуваат крај со крај“, ни откри неодамна една наша сограѓанка која и оваа година ќе замине на сезонска работа во Хрватска.

И како што ни вели таа, со неколку месеци работа заработува како за цела година во Македонија, а многу важно е и тоа што на овој начин, бидејќи за сезонските работници во оваа земја има обезбедено и храна и сместување, успева и да заштеди некој денар.

Повеќе за ова прочитајте тука..