Во Бугарија поскапуваат и молитвите: Свеќите со нова „света“ цена

Од први ноември важат нови повисоки цени за свеќите што верниците ги палат во храмовите на Бугарската православна црква.

Со одлука на Светиот синод на БПЦ од 21 октомври, се воведува делумна промена на цените на црковните парафински и восочни свеќи, а кои ќе бидат наведени и во евра, покрај во левови.

Според новата одлука, свеќите од 0,80 стотинки (или 25 денари во МКД) сега ќе чинат 1 лев (32 денари), додека цената на свеќите од 6 лева се зголемува на 8 лева. Цените ќе се прикажуваат во леви и евра.

Единичната цена на црковните парафински свеќи е: 0,40 лв. (0,20 €), 1,00 лв. (0,51 €), 2,00 лв. (1,02 €), 4,00 лв. (2,05 €) и 8,00 лв. (4,09 €).

Цените на восочните свеќи се: 1,00 лв. (0,51 €), 2,00 лв. (1,02 €), 4,00 лв. (2,05 €) и 8,00 лв. (4,09 €).

Веќе се појавија коментари дека би било поудобно за верниците и продавачите ако цените во евра се заокружуваат за полесна наплата.