Успешна спасувачка акција: Извлечени две лица што со автомобил заглавиле во надојдената вода на Пчиња
Поради излевање на реката Пчиња, ТППЕ (Територијалната противпожарна единица) Старо Нагоричане утрово во 07:35 часот интервенираше за спасување на две заглавени лица.
Интервенцијата се случила по повик од 112, а лицата биле заглавени во близина на бањата во село Стрновац, Општина Старо Нагоричане. Единицата интервенирала со едно возило и двајца пожарникари.
Поради опасноста од излевање на реката, се апелира до граѓаните на Општина Старо Нагоричане да избегнуваат секакво движење и активности по течението на река Пчиња.
Состојбата во државата по обилните врнежи од дожд е стабилна, согласно последните информации од РЦУК 7/24. Водостоите на водотеците се во рамки на нормалата, со благо покачување, информира директорот на ЦУК, Мухамед Али.
Регистрирани се следните појави и преземени активности:
• Одрон на патниот правец Битола – Прилеп, кај с. Лознани. Известени: МВР ПС Битола и ЈП за одржување на регионални и магистрални патишта – подружница Битола.
• Одрон од голем камен на патниот правец Ресен – Охрид, кај Буково. Известени: МВР ПС Ресен и ЈП за одржување на регионални и магистрални патишта.
• Поплавен објект (фарма) во с. Породин, Општина Битола. Известен: Началникот на штабот за заштита и спасување при Општина Битола.
• Поплавена визба на ул. 24 бр. 10 во Битола.
• Одрон на патниот правец с. Близанско – Македонски Брод, во должина од околу 15 метри. Известено: ЈП за одржување на регионални и магистрални патишта. Надлежните служби се координирани и активно постапуваат на терен.
