Уште еден македонски град се претвори во новогодишна бајка – ѕвездено небо и елка во центарот! (фото)

Празничниот дух полека се буди низ Македонија, а градовите еден по еден се претвораат во вистински зимски бајки. По магичните декорации во Крива Паланка и Штип, кои деновиве привлекоа огромно внимание поради впечатливите светлечки инсталации, празничниот сјај пристигна и во Велес.

Градот блесна во новогодишно руво, откако дрвјата долж централните улици се обвиени со илјадници светилки, пешачките патеки добија ефект на „ѕвездено небо“, додека украсните панделки и поставената елка ја комплетираат празничната сцена.

Декорацијата во Велес доаѓа во период кога жителите низ целата држава со нетрпение ја очекуваат празничната сезона. Додека во Скопје засега е украсен само еден потесен дел од центарот, останатите македонски градови забрзано работат да создадат празнична атмосфера што ќе ги развесели граѓаните и ќе донесе повеќе оптимизам пред новогодишните денови.

По впечатливите примери на Крива Паланка и Штип, кои годинава се истакнаа како едни од најубаво декорираните места во земјата, Велес се приклучи на листата градови што веќе официјално ја најавија празничната магија.