Емилија Спасовска е генерален менаџер на „Нутри Ем“ – компанија која нуди услуги и советување во областа на нутриционизмот, здрав начин на исхрана и здрави навики.
Tаа со својата посветеност во работата менува животи и подобрува здравје на многу нејзини клинети.
– Да се биде нутриционист е навистина благородна и одговорна професија која менува животи. За мене, исхраната не е диета, туку начин на живот. Се стремам да го живеам она што го советувам на моите клиенти: баланс, разновидност и интуитивно јадење. Јадам сè, но во умерени количини, и внимавам на квалитетот на храната – вели Емилија за Гламур
За убавината вели дека е е одраз на внатрешната рамнотежа и здравје.
-Таа не е само физички изглед, туку хармонија помеѓу телото, умот и духот. Убавината се гледа во :здравата и негувана кожа, самодовербата и позитивната енергија, радоста и благодарноста што ја носиме во себе додава Емилија. За што друго поразговаравме околу негата и убавината кај неа прочитајте во продолжение.
Да се биде нутриционист е благородна професија. Колку Вие лично внимавате на исхраната?
Да се биде нутриционист е навистина благородна и одговорна професија која менува животи. За мене, исхраната не е диета, туку начин на живот. Се стремам да го живеам она што го советувам на моите клиенти: баланс, разновидност и интуитивно јадење.
Јадам сè, но во умерени количини, и внимавам на квалитетот на храната. Преферирам сезонски, локални и минимално обработени производи. Најважно е да го слушам моето тело кога и колку навистина има потреба од храна. Тоа е вистинската слобода и зрелост во исхраната.
Како изгледа Вашето утро и кои се Вашите ритуали?
Денот го започнувам пред изгрејсонце, околу 6:30 часот. Најпрво практикувам 10-минутна медитација и свесно дишење, што ми овозможува мирен и фокусиран почеток. Потоа пијам чаша топла вода со лимон, а следи кратко истегнување или прошетка.
Појадокот е задолжителен, најчесто тоа е овес со протеин, ленено семе и свежи бобинки или пак интегрално лепче со намаз и сл. До 9 часот сум подготвена за ден исполнет со енергија и продуктивност.
Што секогаш се наоѓа во Вашиот несесер?
Јас сум поборник на принципот „помалку е повеќе“. Во мојот несесер се наоѓаат тематски одбрани производи кои ја истакнуваат природната убавина: тонирана крема со СПФ, лесен коректор, водоотпорна маскара, хидратантен кармин во природна нијанса или црвен кармин во зависност од пригодата кремасто руменило за здрав сјај.
Како ја дефинирате убавината?
За мене, убавината е одраз на внатрешната рамнотежа и здравје. Таа не е само физички изглед, туку хармонија помеѓу телото, умот и духот. Убавината се гледа во :здравата и негувана кожа, самодовербата и позитивната енергија, радоста и благодарноста што ја носиме во себе.
Колку време посветувате на личната нега?
Личната нега е инвестиција во себе, а не обврска. Дневната рутина ми трае околу 15 минути наутро и навечер: чистење, тонирање и серум (витамин Ц наутро, ретинол навечер), хидратација со крема, неделно маска за коса и лице.
Тоа е мојот мал ритуал на благодарност кон телото и умот.
Дали користите козметички третмани и кои најчесто?
Да, но умерено и свесно. Верувам во континуирана домашна нега и минимално инвазивни третмани. Најчесто правам: хидратантни третмани за лице со хијалурон, масажа на грб и врат како дел од мојата велнес рутина. Избегнувам хемиски пилинзи и третмани кои можат да ја нарушат природната бариера на кожата.
Кој е Вашиот омилен парфем?
Мојот избор на парфем секогаш зависи од расположението и енергијата на денот. Во моментов најчесто користам Carolina Herrera – Good Girl и Gucci Bloom, два парфеми кои совршено ја отсликуваат мојата женственост и динамика.
„Good Girl“ ја обожавам поради нејзината сензуална, но истовремено елегантна нота – комбинација на сила и суптилност. „Gucci Bloom“, пак, е мојот избор за утрата и пролетните денови – свеж, цветен и инспиративен, со мирис кој внесува ведрина и самодоверба.
На што најмногу трошите при шопинг?
На квалитетна храна, книги и патувања. Кога купувам облека, приоритет ми се удобноста и материјалот, не брендот. Преферирам безвременски парчиња со квалитет, кои траат подолго од една сезона.
Како ја одржувате линијата?
Мојата форма е резултат на балансирана исхрана и редовна физичка активност. Вежбам 3–4 пати неделно, комбинирајќи Пилатес, јога и лесен Кардио-тренинг. Целта не е да бидам слаба, туку здрава, силна и енергична.
Како би се опишале себе си? Што Ве движи напред?
Себеси се опишувам како емпатична, дисциплинирана и љубопитна личност. Она што ме движи напред е страста за учење и желбата да им помогнам на луѓето да го пронајдат својот потенцијал. Верувам дека личниот развој е постојан процес.
Дали надворешниот изглед е пресуден за прв впечаток?
Надворешниот изглед може да го привлече вниманието, но внатрешната енергија и ставот се тие што оставаат трага. Искрената насмевка и самодовербата се најмоќниот аксесоар на секоја жена.
Што мислите за естетските корекции?
Естетските корекции се личен избор. Ги поддржувам кога се прават со мерка и свесност, со цел подобрување на самодовербата, а не менување на идентитетот. Преферирам природен изглед и суптилни третмани што ја поттикнуваат регенерацијата на кожата.
Колку љубовта влијае на убавината?
Љубовта е нај природниот еликсир за убавина. Кога жената е сакана и кога таа се сака себеси тоа се гледа во нејзините очи, држење и насмевка. Љубовта ја омекнува енергијата и внесува младешки сјај.
На која дама ѝ се восхитувате?
Се восхитувам на жените кои се автентични и храбри да живеат според своите принципи. Особено ги ценам оние кои успеваат да ја балансираат кариерата и семејството, а притоа ја задржуваат својата емпатија и достоинство.
Каква е современата жена според Вас?
Современата жена е интегрирана и свесна. Таа е амбициозна, но знае да одмори. Независна, но не се плаши да побара поддршка. Таа се грижи за своето здравје, ја познава својата вредност и живее во склад со себе, токму тоа ја прави вистински убава.
