Тука се прават најдобрите детски журки без родители – како Елена Стојановска создаде магично катче каде децата се ѕвезди на подиумот

Во време кога децата се сè повеќе во дигиталниот свет, таа одлучи да им подари вистинско, реално, светлечко место за забава. Елена Стојановска е мајка, претприемачка и визионерка која го основа првото специјализирано диско за деца – „Диско Кидс“, каде најмладите уживаат во музика, светлосни ефекти и журки без присуство на родители, но со целосна сигурност.

Во интервју за гламур.мк, Елена открива како настанала идејата, што најмногу ги радува децата и зошто родителите сè почесто сакаат и тие да се приклучат на подиумот.

Кога и како се роди идејата за отворање на диско за деца, дали бевте инспирирана од некое лично искуство или од потреба што ја забележавте во заедницата?

– Идејата за „Диско Кидс“ се роди од комбинација на лично искуство и реална потреба што ја забележав како родител, особено кај децата на возраст од 7 години па нагоре, колку што имаше мојата ќерка во тој момент. Бев во потрага по простор, по место каде што акцентот ќе биде ставен на децата и нивната забава, журка, без притоа родителите да имаат какви било грижи околу самата организација и безбедност на децата.

Со што се разликува детското диско од класичните детски игротеки? Што нуди вашето катче што другите места не го нудат?

– „Диско Кидс“ не е класична игротека, туку тематски простор за забави, журки, каде главен акцент е ставен на музиката, танцот и вистинската диско атмосфера прилагодена за детска возраст. Наместо вообичаените играчки и гужви од трчање, кај нас децата уживаат во светлечки подиум, диџеј музика, светлосни ефекти и интерактивни игри водени од наши аниматори.

Она што нè издвојува е концептот „детска журка без родители“- безбедно е и организирано, со цел да се развие самостојност кај децата. Тука имаме автентична диско атмосфера – светлечки подиум, smoke machine, музика по избор, а имаме и тим на аниматори – што водат игри, танцови предизвици и забавна програма.

Секако, забавата не поминува и без фотографирање и видео спомени – со професионално осветлување и позадини. И најважно, станува збор за затворен приватен простор, резервиран само за вашето дете и неговите гости, без мешање со други групи.

Кој дел од организирањето родендени и детски забави е најголем предизвик, а кој дел е најголемо задоволство за Вас лично?

– За мене, најголем предизвик е да ги натераме сите деца да се приклучат во игрите. Особено на почетокот на роденденот, кога повеќето се срамежливи, а особено момчињата, па треба многу внимание и енергија за да се опуштат, да почнат да играат, да си нарачуваат песни и навистина да уживаат.

Но, токму затоа, најголемото задоволство доаѓа на крај, кога не сакаат да заврши забавата, кога децата се распеани и разиграни, а родителите позитивно изненадени што првпат го гледаат своето дете како танцува и се изразува со толку радост и слобода.

Каква музика преферираат денешните деца? Дали некогаш сте имале „детски диџеј“, некое дете што самото сака да пушта музика и да ја води забавата?

– Денешните деца се многу поврзани со современата музика и најактуелните трендови. Најмногу поп и денс хитови, како и песни што станале вирални преку Тик-ток.

Момчињата често ги сакаат натпреварувачките и спортските песни, додека девојчињата преферираат мелодични и весели песни со позитивна енергија. Во „Диско Кидс“ внимаваме да ги следиме најновите музички трендови за да им овозможиме на децата вистинско уживање и забава.

Често се случува да сакаат да застанат покрај диџеј пултот и самите да ја контролираат музиката – да нарачуваат, менуваат или дури да прават „сет-листи“. Но, уште почесто им е интересно да се во улогата на аниматор, да водат игри, да ги најавуваат активностите и да бидат „водичи на забавата“.

Дали и родителите може да се вклучат во забавата, на подиумот?

– Секако! Родителите се секогаш добредојдени да се вклучат во забавата и да се забавуваат на светлечкиот подиум заедно со децата. Често ни се случува и тие да нарачаат песни, па така се создава вистинска заедничка атмосфера и незаборавни моменти.

Кое е најнеочекуваното или најсмешното нешто што ви се случило на некоја детска диско-забава? Некој момент што никогаш нема да го заборавите?

– Интересен а и неочекуван беше моментот кога шест девојчиња решија да прават селфи во тоалетот, кој резултираше со скршена тоалетна школка. За среќа, немаше повредени (се смее, н.з).

Децата често кажуваат искрени и смешни коментари, што е најслаткото нешто што ви рекло дете по завршена забава?

– Децата навистина знаат да изненадат со нивните искрени коментари, и меѓу себе, и директно упатувајќи ги до нас. Ном најдраги ни се моментите кога роденденот сè уште не е ни завршен, а веќе им велат на родителите: ‘И следната година пак тука сакам!’ Тоа е најубавата потврда дека сме создадале вистинско доживување.

Исто така, секогаш ни се полни срцата кога ќе видиме некоја симпатична порака напишана на ѕидот – цртеж, „најубаво ми беше“, или едноставно срце со име на другарчето.

Што е следно? Планирате ли нови формати, тематски забави или проширување на концептот и во други градови?

– Веќе имавме одлични искуства со организација на журки за крај на учебната година, и сакаме да понудиме слични опции и за Нова година, со забави во стилот на лотарии и ‘Сикрет Санта’.

Исто така, „Диско Кидс“ е подготвен да понуди и филмски роденденски пакети, односно, тематски забави инспирирани од омилените филмови. Сепак, засега го чекам вистинскиот момент да го лансирам овој формат, за да биде навистина совршен за децата и нивните родители.

Што се однесува до проширувањето, засега во план е само да се опфати другиот дел од градот; значи уште едно „Диско Кидс“ во Скопје.