Тоа беше последното затворање на вратата, последниот здив на мојот свет – сведоштво на таткото на загинатата Надица во Кочани (видео)
Таткото на трагично загинатата Надица Наунова, Александар Наунов, сподели емотивна порака на социјалните мрежи, посветена на неговата ќерка. Во објавата, која ја придружува и видео-снимка од безбедносни камери, моментот кога Надица за последен пат излегува од својот дом, тој низ трогателни стихови ја излеа својата болка и вечната татковска љубов.
-Тоа беше обично затворање на врата … Но за менe, тоа беше последниот здив на мојот свет. Моето дете, мојата Надица, ја затвори вратата со насмевка, а јас не знаев дека зад неа ќе остане нејзиниот живот, заробен во пламен, во неправда, во тишина што нема крај“, напиша Наунов.
Во својата порака тој ја опишува неизмерната празнина што ја чувствува по загубата, но и вечната љубов што ја носи во себе.
-Наместо да ја чекам со внуци во прегратка, јас ја чекам во соништата, таму каде што не гори. Наместо нејзиниот глас, слушам ехо од болка, наместо чекори по ходникот … тишина што ме гуши.
Иако времето минува, болката не стивнува.
-Помина време, но не и мојата болка. Надица, ти остана вечна во моето срце, во секоја свеќа што ја палам, во секоја солза што не престанува. Твоето име ми е молитва, твојот лик – вечна светлина. И додека светот заборава, јас ќе живеам за да те паметам, завршува неговата објава.
Објавата на Александар Наунов предизвика бројни реакции на социјалните мрежи, а многумина му упатија зборови на поддршка, сочувство и сила во оваа незамислива болка.
