Сузана Турунџиева по девет години од смртта на сопругот – „Сами доаѓаме на овој свет, никој не гарантира дека ќе заминеме во пар“ (Видео)

Девет години по смртта на нејзиниот сопруг Марјан Јовановиќ, водителката и писателка Сузана Турунџиева отворено проговори за тоа како денес го гледа бракот, осаменоста и љубовта. Гостувајќи во емисијата „Нешто конкретно“ со Снеже Велков, таа искрено откри дека не чувствува потреба по секоја цена повторно да влезе во брачна заедница.

„По смртта на мојот сопруг, се насочив кон други работи и не сметам дека човек мора да има партнер за да биде комплетен. Ние сами доаѓаме на овој свет, и никој не гарантира дека ќе заминеме во пар“, изјави Турунџиева.

Advertisement

Водителката нагласи дека искрено се восхитува на успешните бракови, но со години гледа и бројни примери на луѓе кои живеат во осаменост и покрај тоа што имаат партнер.

„Секоја чест на оние што успеваат да се синхронизираат и да го носат товарот на брачната заедница. Но има многумина кои се чувствуваат сами иако се во брак“, додаде таа.

Турунџиева вели дека не ја исклучува можноста повторно да засака, но дека моментално е фокусирана на многу други сегменти од својот живот. Посебно место во нејзиното секојдневие има хорот „Фрида“, кој таа го основаше и кој брои околу 150 жени.

„Имам големо и богато семејство околу себе. Жените од ‘Фрида’ ме прават среќна и постојано се надополнуваме. Искрено, со толку многу преокупации, не ни размислувам за нов брак“, откри Сузана.

Таа е мајка на Лора, која ја доби во бракот со пливачкиот тренер Александар Маленко, и горда баба на седумгодишниот Јаков. Од бракот со трагично починатиот Марјан Јовановиќ ја има ќерката Матеа.