Создади нешто автентично, што има влијание и трајност – бизнис приказни со Јехона Бела за патот до глобален успех од Македонија

Кога започнавме со нашите „Бизнис приказни“, идејата беше да создадеме простор каде што пред сè ќе им дадеме глас и видливост на успешните жени од Македонија – оние што се на лидерски позиции или изградиле сопствен бизнис, за да можат да го споделат со нашите читатели своето искуство, визија и предизвици. Со нив разговараме за тоа како ја започнале својата професионална патека, кои биле клучните моменти на нивниот успех, како се справуваат со пречките, но и каков баланс постигнуваат помеѓу кариерата и секојдневието.

Овој пат имавме чест да разговараме со Јехона Бела, управителка на компанијата Institute Lab – специјализиран бренд кој гради мост меѓу медицината и козметиката, со фокус на научно заснована нега на кожа. Нејзината професионална приказна е инспиративен пример за тоа како страста кон науката и визионерскиот пристап можат да создадат вредност, не само на локално, туку и на интернационално ниво.

Јехона зборува отворено за своите почетоци, предизвиците со кои се соочува како жена-менаџер, визијата што стои зад Institute Lab, но и за вредностите што сака да ги пренесе на идните генерации жени-претприемачки. Таа верува дека успехот не се мери само во резултати, туку во автентичноста на она што го создаваш. Во продолжение, прочитајте го целото интервју со оваа храбра, посветена и инспиративна жена која докажува дека и од Македонија може да се гради бренд со глобален потенцијал.

Можете ли да ни кажете нешто повеќе за вашата професионална позадина пред да започневте со Institutе Lab? И како тие искуства придонесоа за вашиот сегашен успех?

Мојата професионална приказна започна со длабок интерес за науката, козметиката и човечкото здравје. Во текот на кариерата стекнав искуства во повеќе сектори – од менаџмент и маркетинг, до работа со медицински професионалци. Сето тоа ми помогна да го разберам балансот меѓу научната валидност и потребите на крајниот корисник.

Работата на развој на наш сопствен производ во Македонија беше едно од најзначајните и најпредизвикувачки искуства во мојата кариера – процес што бараше голема посветеност, упорност и тимска поддршка. Тоа ме формираше не само како професионалец, туку и како личност.

Advertisement

Која е формулата или тајната за успешна жена бизнисмен?

Нема универзална формула, но верувам дека комбинацијата на јасна визија, дисциплина, емпатија и способност да носиш тешки одлуки е клучна. Жените имаат природна сила да гледаат на работите холистички – што е предност во секоја индустрија. Успехот доаѓа кога ќе се научиме да веруваме во сопствениот глас, да си дадеме дозвола да сонуваме големо и да не се извинуваме за тоа.

Какви предизвици се соочивте како жена менаџер во развојот на еден специјализиран медицинско-козметички бренд во Македонија, и како ги надминавте?

Да се биде жена менаџер во Македонија е предизвик сам по себе, но да се создаде одржлив, медицинско-козметички бренд е уште поголем предизвик.

Создадовме производ „од нула“, во земја каде вакви иницијативи ретко добиваат поддршка. Преку посветен тим, јасни стандарди и конзистентна визија, не само што ги надминавме тие бариери – туку денес сме подготвени да го пренесеме брендот надвор од границите.

Institute Lab става акцент на здрава кожа преку научен пристап – како успевате да балансирате меѓу научната експертиза и пазарната конкурентност, особено како жена во оваа индустрија?

Тоа е постојан баланс меѓу етичко и ефективно. Нашиот фокус отсекогаш бил на безбедност, докажани активни состојки и едукација на клиентот. Во индустрија каде често доминираат маркетинг-празнини, нашиот научен пристап е токму она што не издвојува. Како жена во оваа област, гледам на брендот како на жива платформа за доверба – не само во производите, туку и во вредностите што ги застапуваме.

Како менаџерка и лидерка, каква визија имате за иднината на жените во бизнисот со медицинска козметика и кои вредности сакате да ги пренесете на идните генерации жени-претприемачки?

Верувам дека иднината на жените во бизнисот, особено во медицинската козметика, треба да биде храбра и амбициозна. Сакам мојата приказна да покаже дека, и покрај тоа што е исклучително тешко да се создаде нешто во Македонија, не е невозможно. Нашиот нов бренд концепт, со кој целиме кон интернационален раст, е доказ дека упорноста и вербата во идејата носат резултати.

Дали според Вашите согледувања и искуства материјалното го води светот?

Живееме во време каде материјалното е многу видливо и често добива претерана тежина. Но вистинската вредност, според мене, лежи во нешто подлабоко – да создадеш нешто автентично, што има влијание и трајност. Материјалниот успех може да биде резултат, но не и мотивација. За мене, квалитетот што го создаваме, довербата што ја градиме и ефектот што го имаме – тоа се вистинските „валути“ на успехот.

Каков е односот кон жените лидери во Македонија? Дали сме родово сензитивни?

Иако има напредок, родовата сензитивност сè уште не е вградена како културна норма. Жените лидери често мора да докажуваат двојно повеќе за да бидат земени сериозно. Но, тоа полека се менува – особено кога жените се појавуваат со резултати, визија и став. Верувам дека нашето општество има капацитет за зрелост – само ни треба повеќе поддршка, повеќе примери и отворена дебата.

Кои се Вашите приоритети како жена бизнисмен?

Мој приоритет е да создадам долгорочен, одржлив бренд со реална вредност – и за кожата, и за пазарот. Но исто така, мој личен приоритет е да покажам дека и во Македонија може да се создаде производ со глобален потенцијал. Токму во овој момент сме и во процес на спроведување на една од најголемите стратешки иницијативи во компанијата,насочени кон долгорочен раст, иновации и зајакнување на нашата пазарна позиција. Овие промени се вистински пример за тоа што ме мотивира и прави горда.

Како се релаксирате и каде ја црпите енергијата за секојдневието?

Релаксацијата за мене значи исклучување од бучавата и поврзување со тишината – понекогаш преку природа, понекогаш преку книги, или едноставно квалитетно време со семејството. Енергијата ја црпам од луѓето што веруваат во мене, од тимот што стои зад секоја мала победа, и од чувството дека правам нешто што има смисла.

И на крај, постои ли одредена мантра, цитат или потврда што ја држите блиску до вашето срце?

Да – постојано се навраќам на една мисла:

„Создади го она што ти недостасува – и не чекај да биде совршено време.“

Таа мантра ме потсетува дека секоја иницијатива, колку и да изгледа мала или тешка, може да прерасне во нешто големо ако се гради со страст, истрајност и вистински вредности.