Смртта на основачот на Mango се истражува како убиство – главен осомничен е неговиот син
Тензијата меѓу таткото и синот се зголемила непосредно пред трагедијата.
Исак Андик, основачот на модниот бренд Манго (Mango), кој почина минатата година по пад од голема височина во планините близу Барселона, сега повторно е во центарот на вниманието.
Новите информации откриваат дека неговата смрт се истражува како намерно убиство, а главен осомничен е неговиот син, Џонатан Андик, пренесува шпанскиот весник El País.
Во декември 2024 година, 71-годишниот бизнисмен заминал на планинарење на планината Монсерат. Според тогашните извештаи, тој „се лизнал и паднал во длабока бездна“, а случајот бил затворен како несреќен случај.
Меѓутоа, неговиот син Џонатан бил единствениот сведок. Тој изјавил дека одел пред татко му и не видел што точно се случило.
Подоцна, според новите сведочења, истражителите забележале дека неговата изјава била „неконзистентна“, што предизвикало сомнежи.
Партнерката на Исак, Естефанија Кнут, дополнително изјавила дека таткото и синот подолго време имале нарушени односи.
Иако засега нема цврсти докази дека Џонатан е виновен, El País наведува дека постојат неколку индиректни траги кои го натерале истражниот тим да ја отфрли верзијата за несреќа и да ја разгледува смртта како убиство.
Според радио Cadena SER, тензијата меѓу таткото и синот се зголемила непосредно пред трагедијата, за време на Божиќната прослава во компанијата, Исак јавно изјавил дека контролата над Mango ја пренесува на извршниот директор, а не на својот син.
Дополнително, наговестил дека Џонатан не се покажал добро во раководењето со фирмата, по што синот го напуштил настанот.
Семејството на Андик денес излезе со кратко соопштение:
„Не даваме коментари во врска со истрагата. Почитуваме сè што преземаат надлежните органи и ќе продолжиме да соработуваме со нив. Убедени сме дека овој процес наскоро ќе заврши и дека невиноста на Џонатан Андик ќе биде докажана.“
По смртта на Исак, Џонатан беше именуван за потпретседател на управниот одбор на Mango и претседател на холдингот MNG, додека неговите сестри добија свои високи позиции во компанијата.
Во моментот на неговата смрт, богатството на Исак Андик се проценуваше на 4,5 милијарди долари.
