Гранд продукција работи на документарен филм посветен на Саша Поповиќ, една од највлијателните личности на регионалната музичка сцена.
Проектот, кој е во тек веќе извесно време, според продуцентите, е исклучително сложен и вклучува голем број соговорници, локации и архивски материјали.
Снимањето се одвива на повеќе локации во Белград и во Нови Сад, а досега пред камерите зборувале над 50 личности, вклучувајќи соработници, пријатели и членови на семејството кои го обележале животот и кариерата на Саша.
Проектот се реализира во тесна соработка и со целосна поддршка од семејството на Поповиќ, сопругата Сузана, синот Даниел и ќерката Александра, со цел филмот на автентичен и емотивен начин да го прикаже неговиот професионален пат, но и личната страна, која публиката ретко имала можност да ја види, пишува Гранд.
Премиерата на документарниот филм е планирана за годишнината од смртта на Саша Поповиќ, како почит кон неговиот неизбришлив придонес за музичката индустрија и популарната култура во регионот.
Од Гранд продукција велат дека целта на проектот е да се зачува споменот на човекот кој оставил длабока трага во музиката и шоу-бизнисот, како и да се осветли неговиот живот од различни перспективи преку сведоштвата на најблиските.
