Романса од струмичкото корзо – Како Горан и Ленче Кукиќ ја започнаа својата љубовна приказна?

Познатата музичка двојка од Струмица, Горан и Ленче Кукиќ, денес е симбол на долгогодишна љубов и заедништво, но нивната приказна започнала спонтано – токму на струмичкото корзо, местото каде што се случуваат многу локални љубови.

Горан, кој во 2016 година ја освои победата во музичкото шоу „Никогаш не е доцна“, и Ленче, двојна победничка на истото шоу во 2019 година, со години важат за едни од најубавите музичко-брачни партнери кај нас. Иако многумина мислат дека се запознале на сцена, нивната романса почнала многу пообично – и многу поромантично.

Во гостување во емисијата „Мастраф муабет“, двајцата со насмевка се потсетија на првиот момент.

„Струмица е мало гратче, личи на Лондон – има триста чуда“, се пошегуваа. „Се запознавме на улица, на струмичкото корзо. Прво јас ја забележав“, раскажа Горан, по што Ленче веднаш му дофрли: „И јас сум фрлила око! И он фрлил – и хоп, се најдовме!“

Ленче подоцна ја дополни приказната и во „Еден на Еден“, кога откри дека моментот ѝ се врежал во меморијата.

„Чекав другари да ме земат. Влегувам во кола – а таму Горан Кукиќ! Си викам: ‘О Боже, од дека бе ти?’ Го знаев, ама не сум го видела одамна. Го погледав и си помислив: ‘Ќе го биде!’ И така и беше.“

По неколку месеци врска, двајцата решиле да не ја „растегнуваат работата“ – се венчале брзо, по сопствено чувство, без премногу размислување. Денес, речиси три децении подоцна, велат дека уште ја живеат истата љубов.

„Му благодарам на Господ – долго сме заедно, речиси 30 години“, со гордост изјави Ленче.

Љубов како нивната е доказ дека најубавите приказни понекогаш почнуваат на најобични места – а траат цел живот.