Ако сте во потрага по брз и топол оброк, овие тортиљи се како создадени за вашата трпеза.
Печурките се здрава намирница која изобилува со хранливи материи, а денес ви прикажуваме еден рецепт за вкусни тортиљи кои се подготвуваат за само 15 минути.
Потребни состојки:
- Половина лажичка маслиново масло
- 1 чешне лук
- Половина килограм печурки по избор
- Зачини: сол, црвена пиперка, црн пипер, чили… (по ваш вкус)
- 2 тортиљи
- Зеленчук: Домати, зелка, пиперка
Начин на подготовка: Исчистете ги и исечете ги печурките на тенки кругови. Но, никако не мијте ги со вода, туку исчистете ги со крпа или четка. Во еден сад загрејте малку масло и додајте го лукот. Кога ќе добие жолта боја, додајте ги печурките и малку посолете ги, па додајте ги и останатите зачини. Пржете така околу 10 минути, додека печурките не пуштат вода, а за да го забрзете процесот, пожелно е да го поклопите садот. Додека се варат печурките, исечете го зеленчукот. Кога пржењето на печурките ќе ви биде при крај, додајте го преостанатиот зеленчук и сето тоа добро промешајте го и оставете го да се пржи уште една до две минути. Потоа извадете ги тортиљите, на нив наредете ја готовата смеса од зеленчук, па потоа замотајте.
