Рафаело торта без печење и готова за миг – кремаста, се топи во уста

Рафаело тортата е еден од оние десерти што секогаш наоѓа место на трпезата – едноставна, без печење, со лесни состојки и вкус кој многумина го сакаат. И ние сме „луди“ по оваа торта.

Овој рецепт не бара посебни вештини, туку само малку време и добра волја, а резултатот е торта со богат вкус, одличен избор за летните денови.

Оваа варијанта на подготовка, инспирирана од рецептот што се пренесувал од генерација на генерација, се прави со состојки што најчесто сите ги имаме дома. Без украсни трикови и без гламур, само едноставна подготовка и проверен вкус.

Во продолжение ви го пренесуваме рецептот чекор по чекор – таков каков што го правеле нашите баби, но со мали прилагодувања за денешната кујна.

Состојки:

За фил:

5 јајца

200 г шеќер

1 кесичка ванилин шеќер

150 г густин

1,3 л млеко

Други потребни состојки :

300 г пишкоти

200 г крем сирење

150 г кокос (во ќесичка)

80 г бело чоколадо (стопено)

Рафаело бомбици за декорација

Подготовка:

Во тенџере изматете ги јајцата, шеќерот, ванилин шеќерот и густинот. Потоа постепено додавајте го млекото и варете на тивок оган со постојано мешање околу 5 минути, додека се згусне како пудинг. Тргнете го од оган и оставете го да се лади на собна температура околу 1 час.

Во изладениот фил додадете го крем сирењето и кокосот , па сè добро соединете со миксер.

Во калап (25 x 26 см) наредете еден ред пишкоти, врз нив нанесете од филот, па повторете ја постапката. Одозгора прелијте со стопено бело чоколадо и украсете со Рафаело бомбици по желба.

Оставете ја тортата во фрижидер најмалку 2 часа да се стегне. По желба, дополнително разладете ја уште 20 минути пред сервирање.

Совет од баба:

Ако сакате пишкотите да бидат помеки, накратко натопете ги во кокосово млеко или благо засладено обично млеко – ќе добиете уште посочна и повкусна торта!