Прво илустрирано житие за деца за македонска светителка – „Светило на врв планина“

Во недела, 25 мај, со почеток во 17 часот, во Центарот за култура „Браќа Миладиновци“ во Струга ќе се одржи промоција на книгата „Светило на врв планина“ – првото илустрирано житие на Света Спаса Вишенска, специјално адаптирано за младата читателска публика.

Автор на книгата е Јасмина Кантарџиева Димков, а илустрациите се изработени од уметницата Викторија Попоска. Изданието опфаќа седум тематски целини, секоја збогатена со илустрации кои ја приближуваат содржината до детската перцепција, со цел на достапен и едукативен начин да се пренесе животната приказна на светителката.

Според уредникот на книгата, отец Александар Димоски, мотивацијата за создавање на ова дело произлегла од потребата содржините од духовното и културното наследство да станат разбирливи, блиски и инспиративни за децата.

Се работи за прво житие адаптирано за деца на светител канонизиран од Македонската православна црква – Охридска архиепископија.

– Можеби не многу голема по обем, но непрегледна по содржина, неоценлива според значењето и благословена во намерата, сликовницата „Светило на врв планина“ сигурно ќе стане нечие детско Евангелие – вели отец Александар Димоски и додава:

– Преку страниците на книгата, низ житето на света Спаса, гласот Божји ќе допред до детските уши и ќе ги загрее невините срца. Единствен и главен мотив низ страните на книгата е љубовта Христова, која на човекот му дава можност вечно да постои, како во нашиов пример со света Спаса. Затоа и целта на книгата ќе биде, љубовта на младите читатели низ ова книжевно патување да се принесе на олтарот на Вечната Љубов, каде вечно ќе гори, секако со помош и по молитвите на света Спаса.

Не е првпат во православната традиција да се илустрира житие на светител и на таков начин да се доближи до најмладите членови на Црквата, но првпат е да се илустрира и адаптира за деца жите на светител канонизиран од Македонската Православна Црква – Охридска Архиепископија. И токму затоа, нашата книга е важна како првороденче кое го весели целиот дом – објаснува отец Александар Димоски.

Промоцијата неслучајно ќе биде на 25 мај годинава, затоа што на тој датум првпат православните верници ќе ги прослават светите исповедници Спасе Вевчански и Спаса Вишенска, по нивната минатогодишна канонизација и прослава од страна на Светиот архиерејски синод на МПЦ-ОА. На тој ден се навршуваат и шест месеци од упокојувањето на блаженопочинатиот митрополит Тимотеј, кој останува незаборавен во нашите срца, а со негов благослов и отпочна целиот овој проект.

Авторките и промотерите изразија благодарност до Министерството за култура и туризам со чии средства се реализираше ова издание, како и до НУ центар за култура „Браќа Миладиновци“ – Струга, кои прифатија да бидат домаќини на промоцијата.

Настанот е отворен за јавноста. На промоцијата, покрај авторките, за книгата ќе зборуваат писателката Верица Мукоска и отец Александар Крстаноски.