НАПРАВЕТЕ САМИ: Природни освежувачи за простории
Многумина од вас веќе слушнале или прочитале рецепти за природни средства за чистење на домот, а верувам дека и многумина постојано ги користат и на тој начин се заштитуваат себе си и своето семејство од штетните состојки на комерцијалните средства за чистење, а воедно и штедат пари.
Овај пат ќе споделиме неколку едноставни рецепти за освежувачи на простории кои лесно можете да ги направите сами. Состојките кои ги содржат се евтини и достапни насекаде, па нема причина зошто да не ги пробате!.
Рецепт 1: Природен освежувач за домот
Иако сите домаќинки постојано се трудат домот да им биде уреден и чист, едноставно постојат некои места на кои мора да се обрне дополнително внимание. Овој освежувач е во тврда форма и одлично ќе ви се најде за сите места на кои е потребна интервенција: во корпата за нечисти алишта, во кантата за ѓубре, во алиштата кои сте ги складирале за следното лето/ зима итн. Потребно ви е: 2 чаши дестилирана вода или обична вода провриена 10 минути, етерично масло од лаванда или кое било што ви се допаѓа, силиконски калапи за мраз и 300-400 гр. сода бикарбона.
Ставете 20-30 капки етерично масло во половина чаша вода и додајте ја во сад каде што веќе сте ја ставиле содата. Ја додавате и преостанатата вода, постепено, и мешате постојано додека не добиете густа смеса.
Добиената смеса се става во силиконски калапи, на пример за мраз (можете да бидете креативни па да изберете калапи со некои интересни форми на овошје, цветови и т.н.) и се остава да отстои ден-два за убаво да се исуши. Кога смесата ќе биде целосно сува внимателно извадете ги парчињата и распределете ги на важните локации – тоалетот, просторот под лавабото, кујната, кантата за ѓубре, корпата со нечисти алишта, машки чорапи за перење, и не заборавајте ги плакарите – мирисот од лаванда освен што освежува ги брка и молците, така што зимните алишта ќе ви бидат и намирисани и заштитени.
Кога мирисот ќе почне да слабее можете освежувачите да ги ставите во машината за перење заедно со алиштата и тие ќе ви бидат убаво испрани и меки.
Рецепт 2:
Природен освежувач за простории
Наполнете една помала тегличка со сода бикарбона, околу ¼ од тегличката, ставете десетина капки од вашето омилено етерично масло и потоа затворете ја тегличката со алуминиумска фолија или капак на кои ќе направите мали дупчиња.
Освежувачот за простории е готов!
Ако го чувате на видливо место, подбро изберете некоја посимпатична тегличка, или соодветен стаклен сад. Повремено протресете ја тегличката и свежиот мирис ќе биде постојано присутен во просторијата. Освен дома, ваква миризлива тегличка можете да си ставите и во канцеларијата или пак во автомобилот.
