Посна торта без печење „Бел ангел“ за Архангел Михаил – секое залче го открива Рајот, секое парче е благослов
Совршен десерт за свечена празнична трпеза.
Утрешниот ден, 21 ноември, е посебен во православниот календар – се слави Св. Архангел Михаил, една од најпочитуваните и најголемите есенски слави. Оваа слава годинава е посна, а во многу домови токму Архангеловден ја означува и духовната подготовка за претстојните зимски празници.
Како за секоја посна слава, така и за оваа, домаќинките бараат десерти кои се вкусни, кремасти, богати, а сепак без млечни производи и јајца.
Посните торти често знаат да бидат предизвик – но не и оваа!
Тортата „Бел ангел“ одамна е хит меѓу посните десерти. Лесна е за подготовка, не бара печење, има богат фил, прекрасна комбинација на ароми и изгледа свечено, токму како што доликува за славата на „војводата на небесната војска“.
Совршена е за големи семејни собири, за свечена атмосфера и за сите кои сакаат нешто навистина убаво и превкусно, но и посно.
Еве го рецептот:
Потребно е:
1 пакет розен-кори
1 литар соино млеко со вкус на ванила
3 кесички пудинг со вкус на слатка павлака
200 г бела посна чоколада
250 г посен маргарин
200 г шеќер во прав
200 г печени мелени лешници
1 литар растителна посна слатка павлака
Подготовка
Разматете ги пудинзите во мал дел ладно соино млеко.
Преостанатото млеко ставете го да зоврие, па згответе го пудингот како вообичаено.
Додека е уште жежок, додадете ја искршената бела посна чоколада и мешајте додека целосно не се стопи. Оставете да се излади.
Во меѓувреме, изматете го маргаринот со шеќерот во прав до пенеста смеса.
Во изладениот пудинг додадете ја смесата од маргарин и матете додека добиете воздушест, кремаст фил.
Додадете ги мелените лешници и кратко изматете повторно.
Одделно изматете ја посната слатка павлака.
Потоа составете ја тортата по овој редослед: кора – фил – слатка павлака, и така редете додека ги искористите сите состојки.
Последниот слој треба да биде слатка павлака за убав, чист и мек изглед.
Оставете ја тортата да отстои неколку часа (или најдобро да преноќи) во фрижидер за да се стегне и да ги спои вкусовите.
Среќна слава!
