Полиција го сопрела шеф Никола од „Брза кујна“ поради ножеви во гепекот – Готвачот ја откри необичната ситуација
Познатиот готвач Никола Мишковски од шоуто „Брза кујна“ откри необична случка од секојдневието – полиција го сопрела во Скопје и направила претрес на неговото возило, откако самиот им кажал дека во гепекот носи ножеви.
Неговата приказна беше споделена во подкастот „Биди свој“, каде што гостуваше заедно со шеф Кирил Иванов.
Мишковски рече дека ножевите се негово секојдневие и професионална алатка без која не заминува никаде.
„Јас без нож, дефинитивно, не можам. Тоа ми е окупација, пасија, купувам цело време ножеви. Во кола имам сега сигурно десет“, изјави тој.
Ситуацијата станала необична кога интервентната полиција го сопрела на рација.
„Со фантомки доаѓаат и ме прашуваат дали имам нешто да пријавам во гепек. Им велам дека имам ножеви. ‘Иии, ножеви?!’ Им објаснувам дека сум готвач, ама додека да сфатат кој сум… Отвараат – вистина ножеви. Јас ги имам спакувано како што треба, тоа ми е алат како на мајстор што работи со штрафцигер“, раскажа Никола.
Готвачот откри и детали од професијата, додавајќи дека работата во кујна често е тензична и исцрпувачка.
„Можам да издвојам еден куп моменти каде што сфаќам зошто мажите и жените тешко ја издржуваат оваа професија. Во кујната е дефинитивно тензично. Не знаете како е пред Нова година, има премногу работа“, додаде Мишковски.
