Повторно тага и жал во светот на музиката…
Adam Yauch, попознат како MCA од култниот New York-шки бенд Beastie Boys замина од овој свет на возраст од 47 години, после скоро три години борба со ракот.
Вака гласеше соопштението кое го издаде продуцентот Russell Simmons на официјалниот сајт на продуцентската куќа Def Jam Records, во текот на вчерашниот ден:
„Со голема тага ви соопштуваме дека музичарот, рапер, активист Adam “MCA” Yauch, еден од основачите на Beastie Boys, како и на фондацијата Milarepa која што ги организира и продуцира концертите за „Ослободете го Тибет“, како и куќата за филмска продукција и дистрибуција Oscilloscope Laboratories, почина во родниот New York ова утро после скоро три години борба со ракот.“
Во 2009 г. Yauch обелодени дека е болен од рак на грлото. Тој се подвргна на хируршка операција и на терапија со зрачење и од тогаш па наваму не настапуваше во живо. Беше оженет со Dechen Wengdu со која имаше ќерка Tenzin Losel.
Adam е роден како единствено дете во Brooklyn, N.Y. Уште додека беше во средно школо се научи да свири на бас гитара и заедно со Michael Diamond (aka Mike D. ) го оформија бендот Beastie Boys. Првата свирка ја имаа на 17-тиот роденден на Adam. Потоа се запиша на Bard College-от каде после втората година се откажа од студиите, за да се фокусира на музичката кариера.
Другите оригинални членови на бендот се John Berry и Kate Schellenbach. Но Berry многу бргу го напушта бендот и бива заменет со Adam Horovitz (Ad-Rock). Првата песна со која бендот почна да ја создава својата репутација беше “Cookie Puss”, која што веднаш стана сензација во underground сцената во New York.
Две години покасно Beastie Boys почнаа да настапуваат како hip – hop трио, со што станаа првите бели рапери на сцената. Во 1987г. го издадоа првиот официјален албум “Licensed to Ill” за продуцентската куќа на Russel Simmons, Def Jam Records. Нивната мешавина од алтернативен рок, хип-хоп и панк веднаш привлече внимание и од тој момент па натаму нивниот успех започнува. Заклучно со ланската година, издаваат вкупно 8 студиски албуми кои се продаваат ширум светот во над 40 милиони примероци. На последниот албум “Hot Sauce Committee Part Two” Adam го нема препознатливиот, ’рапав‘ вокал на Adam, овде тој само свири.
Во спомен и сеќавање на Adam “MCA” Yauch ќе се потсетиме на една нивна добро позната тема…
{youtube}evA-R9OS-Vo{/youtube}
Врати се на првата страна.
