Пере „Нокаут“ со емотивна порака по трагедијата во Кочани – „ако го прокоцкаме и тоа, нема ни што да се свири веќе“
Поемата, со наслов „Ќути кога боли“, инспирирана од трагичните настани и реакциите во деновите потоа, беше објавена на неговиот Инстаграм профил.
По трагичниот пожар во Кочани, кој ја потресе целата земја и регионот, фронтменот на групата „Нокаут“, Никола Перевски – Пере, сподели емотивна поема на своите профили на социјалните мрежи. Преку стиховите, тој упати силна порака против оние што се „насладуваат на туѓиот пекол“, повикувајќи на сочувство, човечност и почитување на вистинските вредности.
Поемата, со наслов „Ќути кога боли“, инспирирана од трагичните настани и реакциите во деновите потоа, беше објавена на неговиот Инстаграм профил. Со овие зборови, Пере ги повика луѓето да покажат емпатија и солидарност, особено во тешки моменти како овие.
ЌУТИ КОГА БОЛИ
Луѓето знаат да гледаат.
Знаат да гледаат директно
во туѓата несреќа.
Да кликнат, да коментираат.
Да се насладуваат на туѓиот пекол
додека грицкаат нешто мрсно од кеса.
Но,знаеш што не знаат?
Да молчат кога е потребно.
Да ја спуштат главата кога не знаат,
кога немаат поим.
Да се тргнат настрана кога болката не е нивна.
Да ги остават луѓето да ги закопаат своите деца
без блиц, шепоти и евтини анализи.
Не барам чуда.
Не барам свет
без врева.
Барем за тие неколку дена,
Бидете луѓе.
Не таблоиди.
Не ловци на туѓа трагедија.
Не доктори за се и сешто.
Само луѓе.
Со душа, ако ни остана.
Затоа што ако го прокоцкаме и тоа –
Нема ни што да се свири веќе.
Неговата објава наиде на голем број реакции и поддршка од обожавателите и јавноста, кои ја препознаа искрената емоција и повикот за поголема човечност во општеството.
