Овој македонски град заплива во иднината – Отворен првиот затворен базен, се пишува нова спортска историја
По повеќе од пет години застој, зимскиот покриен базен во Штип конечно е при крај и се очекува да биде отворен во текот на утрешниот ден, најави градоначалникот на Општина Штип, Иван Јорданов. Изградбата повторно беше активирана пред неколку месеци, по заедничка иницијатива на Општина Штип и Министерството за спорт.
Деновиве започна и асфалтирањето на паркинг просторот околу базенот, кој има капацитет за околу 50 возила, а инвестицијата изнесува 1,4 милиони денари (околу 23.000 евра). Во внатрешноста на базенот се довршуваат последните градежни и технички работи.
Изградбата на базенот започна уште во февруари 2020 година, кога темелникот го постави тогашниот директор на Агенцијата за млади и спорт, Дарко Каевски. Иако првично беше најавено дека објектот ќе биде готов во 2021 година, проектот беше во целосен застој за време на мандатот на неговиот наследник, Наумче Мојсовски, кој воопшто не изврши увид на терен.
Ситуацијата се промени по посетата на актуелниот министер за спорт, Борко Ристовски, во јануари годинава, кој најави интензивирање на работите и нивно завршување до крајот на летото.
Објектот претставува покриен базен со димензии 25 метри должина и 9 метри широчина – прв од ваков тип во Штип. Локалниот пливачки клуб „Челични“ досега зимските тренинзи ги одржуваше главно во странство.
Иако првичната проценка беше дека базенот ќе чини околу 600.000 евра, поради долгото доцнење се очекува крајната цена да биде значително поголема.
Овој базен е дел од иницијативата за изградба на покриени зимски базени во 14 македонски градови, најавена пред седум години од тогашната Агенција за млади и спорт, но досега се реализираа само два. Министерството за спорт најавува дека до крајот на летото, покриени базени ќе добијат уште четири градови, вклучително и Штип.
