Ова село во Грција е новото Монте Карло – годинава е рај за милијардери, монарски и славни личности

Во последниве години Грција сè почесто станува избор за одмор на познатите и влијателните луѓе. Таму неодамна престојувале војводите од Велс, се очекува да ја посети и шпанското кралско семејство, а уште на почетокот на август на јахта покрај бреговите беше забележана и британската кралица Камила.

Иако славните избираат различни места за својот престој, некои го преферираат Миконос, други Керкира или Кефалонија, меѓу најскапите грчки одморалишта постои еден неприкосновен шампион омилен на богаташите во последно време: крајбрежното село Порто Хели.

Сместено на источниот дел од Пелопонез, Порто Хели веќе ја стекна репутацијата на еден од најлуксузните места во светот. Благодарение на својата популарност меѓу кралските семејства и милијардерите, на Запад го доби прекарот „грчки Хемптон“.

До ова место се стигнува за два и пол часа возење од Атина или за само 20 минути со хеликоптер. Популарноста почнала да расте уште во 1970-тите, кога таму почнале да се доселуваат богатите, привлекувајќи нови инвеститори кои изградиле луксузни вили и хотели. Потоа, малку се заборави, за повторно да блесне во потполн сјај.

Дом на кралеви и милијардери

Порто Хели денес го посетуваат грчкото и холандското кралско семејство, познати актери, спортисти и светски бизнисмени. Мештаните раскажуваат дека таму има резиденција кралот на Холандија, а таму е и домот на покојниот грчки крал Константин II.

Меѓу познатите имиња кои престојувале или поседуваат недвижнини во областа се споменуваат рускиот милијардер Роман Абрамович и британската фудбалска легенда Дејвид Бекам. Во минатото, еден од имотите таму му припаѓал и на холивудската ѕвезда Шон Конери.

Приватност и луксуз

Иако не толку гламурозен и преполн со настани како Миконос, Порто Хели сепак знае да понуди ексклузивни случувања. Така, во јуни 2023 година во хотелот Amanzoe, еден од најпрестижните во Европа, беше организирана вечера на „луј витон“, на која присуствуваа бројни холивудски ѕвезди.

И покрај светската слава, Порто Хели останува место за оние кои бараат приватност. Таму нема скапи бутици и раскошни шопинг-центри, туку природна убавина, интимни плажи и мирни заливи.

Влијателните гости најчесто го поминуваат времето на речиси недопрени плажи, во приватни базени и на вечери со најдобрите грчки шефови на кујни. Популарни се и турите со јахта до Сарониските острови и делови од Кикладите, кои вклучуваат посета на рибарски села и историски локалитети.